Bakı, 24 noyabr, Həsrət Mahmudova, AZƏRTAC

Noyabrın 24-də Azərbaycan Respublikasının Gənclər Fondu və Təhsilin İnkişafı Fondunun dəstəyi, “Bir Könüllü” Tələbələrin Əməkdaşlığı İctimai Birliyinin təşkilatçılığı ilə ADA Universitetində “Şuşa İli”nə həsr olunmuş “Gənclər, sülh və təhlükəsizlik” adlı beynəlxalq tələbə forumunun açılış mərasimi keçirilib.

AZƏRTAC xəbər verir ki, forum ölkəmizin ərazi bütövlüyü uğrunda şəhid olan soydaşlarımızın əziz xatirəsinin bir dəqiqəlik sükutla yad edilməsi ilə başlayıb.

Tədbirdə Təhsilin İnkişafı Fondu İdarə Heyətinin sədri Elnur Nəsibov, BMT-nin Azərbaycandakı rezident əlaqələndiricisi Vladanka Andreeva, Azərbaycan Respublikasının Gənclər Fondunun icraçı direktoru Fərid Cəfərov və Beynəlxalq Münasibətlərin Təhlili Mərkəzinin İdarə Heyətinin üzvü Gülşən Paşayeva çıxış edərək Şuşa şəhərinin işğal dövründə maddi-mədəni irsinə vurulmuş zərər haqqında xarici tələbələrin düzgün məlumatlandırılmasında, eləcə də işğaldan sonrakı mərhələdə gələcək inkişaf perspektivlərinin tədqiqi istiqamətində fundamental araşdırmalar aparılması barədə məlumat veriblər.

Tədbir iki panel müzakirəsindən ibarət olmaqla, xüsusi mövzuları əhatə edib.

İlk panel mövzusu olan “Münaqişədən sonra bərpa: Yenidənqurma, uzlaşma və sülh quruculuğu"da BMT-nin Qaçqınlar üzrə Ali Komissarının Azərbaycandakı nümayəndəsi Guido Ambroso, ADA universitetinin Dövlət və İctimai Münasibətlər fakültəsinin dekanı Anar Vəliyev, Xəzər Universitetinin Siyasi elmlər və fəlsəfə departamentinin müdiri Fərid Quliyev və İqtisadi İslahatlar Elmi Tədqiqat İnstitutu Regionların davamli inkişaf problemləri şöbəsinin mütəxəssisi Şükür Quliyev çıxış edərək, mövzu üzrə iştirakçıların suallarını cavablandırıblar.

İkinci panel "Münaqişədən sonra statistika sahəsində vəziyyət: Məcburi köçkünlərin təhlükəsiz və ləyaqətli şəkildə qayıdışı və reinteqrasiyası" mövzusuna həsr olunub. Paneli ADA Universitetinin siyasi elmlər və iqtisadi nəzəriyyə üzrə professoru Kavus Abuşov moderatorluq edib. Panelin qonaqları qismində Milli Məclisin deputatı Erkin Qadirli, hüquq üzrə fəlsəfə doktoru, ADA Universitetinin müəllimi Cavid Qədirov və siyasi ekspert, analitik Orxan Amaşov mövzu üzrə çıxış edib və forum iştirakçıları arasında maraqlı diskussiyalar aparılıb.

Görüş gənclərin maraq dairəsindəki sualların cavablandırılması, qonaqların öz təcrübələrini paylaşması, fikir mübadiləsi, gənc tələbələrə tövsiyələri, həmçinin Azərbaycanın müxtəlif gənclər təşkilatlarının sədrlərinin mövzu ilə bağlı təqdimatlarının nümayişi ilə başa çatıb.

Qeyd edək ki, forumda əsasən xüsusi komissiya tərəfindən seçilmiş beynəlxalq münasibətlər, beynəlxalq hüquq, diplomatiya və s. əlaqəli ixtisaslar üzrə təhsil alan 50 nəfərlik tələbə heyətinin tərkibi 30 fərqli ölkəni təmsil edən, dünyanın top universitetlərində təhsil alan 40 xarici tələbə və 10 yerli tələbə olmaqla təşkil olunub.

Məlumat üçün vurğulayaq ki, 5 gün davam edəcək forum Şuşanın Azərbaycan tarixi və mədəniyyətindəki rolunun vacibliyinin təbliği məqsədilə ölkəmizdə və xaricdə təhsil alan əcnəbi tələbələrin beynəlxalq zəmində bir araya toplaşaraq sülh quruculuğu və təhlükəsizlik istiqamətində məsələlərin müzakirəsi və həlli təkliflərinin verilməsi fonunda keçiriləcək.