Bakı, 26 yanvar, AZƏRTAC

Yanvarın 26-da Gənclər üçün Təhsil Mərkəzi (GTM) 2015-ci ilin yekunlarına dair illik hesabatını ictimaiyyətə təqdim edib.

GTM-dən AZƏRTAC-a bildiriblər ki, Mərkəzin icraçı direktoru Fəxrəddin Həsənzadə rəhbərlik etdiyi qurumun fəaliyyətində şəffaflığın artırılmasının vacibliyini vurğulayıb. Diqqətə çatdırıb ki, Mərkəz gənclərin hərtərəfli inkişafına töhfə vermək məqsədilə 20-dən artıq böyük, 100-dək kiçik layihə həyata keçirib. GTM həmin layihələrin maliyyələşdirilməsi ilə bağlı Gənclər və İdman Nazirliyi, Prezident yanında Qeyri-Hökumət Təşkilatlarına Dövlət Dəstəyi Şurası, Gənclər Fondu, UNİCEF-in Bakı Ofisi, Avropa İttifaqının “Gənclər fəaliyyətdə” proqramı və digər qurumlarla əməkdaşlıq edib. Azərbaycanın 30-a yaxın şəhər və rayonunda həyata keçirilən bu layihələrdə ümumilikdə 20 mindən çox gənc iştirak edib.

Vurğulanıb ki, Mərkəz fəaliyyət dairəsini genişləndirmək və həyata keçirdiyi layihələrin səmərəli icrasını təmin etmək məqsədilə Qubada Şimal regional ofisini yaradıb, Gəncə, Mingəçevir, Ağcabədi, Şirvan və Bakıdakı ofislərinin maddi-texniki bazasını gücləndirib. Hesabat dövründə GTM ilk növbədə gənclər arasında vətənpərvərlik hisslərinin gücləndirilməsi istiqamətində müxtəlif tədbirlər, Qarabağ həqiqətlərinin dünya ictimaiyyətinə çatdırılması məqsədilə virtual aksiyalar təşkil edib. Mərkəzin təşkilatçılığı ilə müxtəlif rayonlarda “20 Yanvar xalqın iradə təcəssümüdür”, “Xocalı həftəsi”, “Şuşasız 23 il” mövzularında tədbirlər, Quba Soyqırımı Memorial Kompleksinə yürüş, Füzuli rayonunda isə “Müstəqillik yolu” adlı konfrans reallaşıb.

Diqqətə çatdırılıb ki, beynəlxalq əməkdaşlığın genişləndirilməsi və Avropa gənclər məkanında layiqli yer tutmaq məqsədilə Mərkəzin üzvlərinin ölkəmizin hüdudlarından kənarda təşkil edilən tədbirlərdə iştirakına xüsusi diqqət yetirilib. Əvvəlki illərdə olduğu kimi, 2015-ci ildə də 100-dək gənc müxtəlif konfrans, təlim, sərgi, simpozium və digər tədbirlərdə iştirak ediblər. Eyni zamanda, GTM tərəfindən “Erasmus+” proqramı çərçivəsində təşkil edilmiş üç beynəlxalq tədbirdə iştirak üçün Azərbaycana müxtəlif ölkələrdən 93 gənc gəlib. Mərkəz 2015-ci ildə Avropa Gənclər Klubları Konfederasiyasının idarə heyətinə namizədliyini irəli sürüb və Azərbaycanı həmin qurumun qərarverici orqanında təmsil etmək imkanı qazanıb. GTM hazırda Konfederasiyanın tamhüquqlu üzvüdür.

Bildirilib ki, Azərbaycanın ev sahibliyi etdiyi birinci Avropa Oyunlarına ictimai dəstək məqsədilə Mərkəz tərəfindən Mingəçevirdə genişmiqyaslı tədbirlər planı hazırlanıb həyata keçirilib. Plana əsasən yaradıcı gənclərin iştirakı ilə festivallar, sərgilər və idman yarışları təşkil olunub. Mingəçevirdə təşkil edilən su idmanı üzrə yarışlarda da Mərkəzin yüzlərlə könüllüsü fəallıq göstəriblər.

Hesabat dövründə regionlarda istedadlı gənclərin üzə çıxarılması məqsədilə yaradıcı gənclərin hazırlıq laboratoriyaları qurulub, “Qızıl payız” gənclərin yaradıcılıq festivalları, Samux gənclərinin ikinci yaradıcılıq festivalı, Qarabağ regional uşaq yaradıcılığı forumu və digər tədbirlər keçirilib. Bölgə gənclərinin məşğulluğunun artırılması, gənclər arasında peşə təhsilinin stimullaşdırılması üçün regionlarda peşə təhsili üzrə regional məsləhət və karyera planlama xidmətləri yaradılıb, gənclərin müxtəlif biznes qurumlarında, habelə kənd təsərrüfatı müəssisələrində praktiki biliklər toplaması üçün istehsalat təcrübəsi təşkil olunub.

Diqqətə çatdırılıb ki, ötən il Mərkəz region gənclərinin bilik və bacarıqlarının artırılması, insan kapitalının formalaşması məqsədilə “aybKitab” layihəsi, Xaçmaz, Qusar, Şirvan, Qubada gənclərin intellektual, habelə idman oyunları üzrə bilik yarışları, Lənkəranda “Hər kəs üçün təhsil” kampaniyası və digər layihələr reallaşdırıb. Gənclər arasında sağlam həyat tərzinin təbliği və ekoloji təfəkkürün formalaşması istiqamətində Bakıda və regionlarda müxtəlif layihələr həyata keçirilib. Belə tədbirlərə məktəblilər arasında futbol yarışlarını, velosiped çempionatını, şahmat turnirlərini, “Sağlam gənclik” kampaniyasını, ekoturizmlə bağlı təlimləri, ekoloji aksiyaları, “Yaşıl məktəb” layihəsini və s. misal göstərmək olar. “Yaşıl məktəb” layihəsi QHT-lərə Dövlət Dəstəyi Şurası tərəfindən 2015-ci ilin ən uğurlu layihələri sırasına daxil edilib.

Bildirilib ki, ötən il Mərkəz gənclər arasında sosial məsuliyyətin artırılmasına yönəlmiş proqramlara da üstünlük verib. Belə ki, əlilliyi olan gənclərin təhsil imkanlarının artırılması ilə bağlı ötən il icrasına başlanan və hazırda davam etdirilən “Qarabağ inklüziv təhsil və uşaq inkişaf mərkəzi”, üç regionda reallaşdırılan “Bir damla həyat ver!” qanvermə aksiyaları, Qubada sosial menecment məktəbi, valideyn himayəsindən məhrum gənclərin cəmiyyətə adaptasiyasına hesablanmış “Onların kimsəsi bizik!” kampaniyaları həyata keçirilib. Ötən ilin sonlarında Mərkəz UNICEF-in Bakı Ofisi ilə birgə regionlarda yeniyetmə və gənclər arasında hüquqların təbliğinə hesablanmış “Yuvenal ədliyyə” layihəsinin icrasına başlayıb.

Mərkəz hər il olduğu kimi, 2015-ci ildə də “QHT Məktəbi”ni davam etdirib. Əsası 2000-ci ildə qoyulan və bu gün də davam edən məktəbin fəaliyyətinin daha da genişləndirilməsi məqsədilə Azərbaycan Turizm və Menecment Universiteti ilə anlaşma memorandumu imzalanıb, yaz və qış təlimlərinin birgə təşkili barədə razılıq əldə olunub. Gənc jurnalistlərin praktiki və nəzəri biliklərinin artırılmasını nəzərdə tutan “Mediaman” jurnalistika məktəbi də ötən il uğurla təşkil olunub. Hesabat dövründə Mərkəz tərəfindən Salyan rayonunda “Gənclərin narkomaniyaya qarşı mübarizə forumu”, Bakıda “Azərbaycan gənclərinin maarifçilik forumu”, Qubada “Gənc sahibkarlar forumu” və digər tədbirlər keçirilib.

F.Həsənzadə daha sonra həyata keçirilən proqram və layihələr, regional ofislərin fəaliyyəti, Mərkəzin tərkibindəki klublar və dərnəklərin işi, beynəlxalq əməkdaşlığın qurulması, 2016-cı ildə nəzərdə tutulan tədbirlər və s. məsələlərlə bağlı sualları cavablandırıb.