GƏNCLƏR VƏ İDMAN NAZİRLİYİNDƏ “SÜLH SƏFİRLƏRİ KORPUSU”NUN NÜMAYƏNDƏLƏRİ İLƏ GÖRÜŞ

14.11.2006 [23:31]
Çap et
A⁺ A^-

AZƏRTAC xəbər verir ki, noyabrın 14-də Azərbaycan gənclər və idman naziri Azad Rəhimov Bakıda səfərdə olan “Sülh səfirləri korpusu”nun nümayəndələri ilə görüşmüşdür.

Korpusun baş komissarı Nadejda Çerboxova bildirmişdir ki, səfərin məqsədi Bakıda MDB və Baltikyanı ölkələrin gənclərinin konqresini təşkil etmək, Dağlıq Qarabağ münaqişəsi ətrafında fikir mübadiləsi aparmaqdır. Sülhməramlı korpusun rəhbəri 2007-ci ilin payızında Moskvada Dağlıq Qarabağ münaqişəsi ilə bağlı “dəyirmi masa” keçirilməsi nəzərdə tutulduğunu qeyd etmişdir. Azərbaycanın mövqeyini dəstəkləyən baş komissar problemin sülh yolu ilə həll olunmasına ümid etdiyini vurğulamışdır.

Azad Rəhimov Dağlıq Qarabağ münaqişəsi barədə geniş məlumat verərək, problemin yalnız Azərbaycanın ərazi bütövlüyü çərçivəsində həll etməyin mümkünlüyünü diqqətə çatdırmışdır. Nazir ölkə rəhbərliyinin düzgün və məqsədyönlü siyasəti nəticəsində bu gün Azərbaycanın sürətli iqtisadi inkişaf yolunda olduğunu, bütün regional layihələrdən kənarda qalan Ermənistanın isə tənəzzül etdiyini vurğulamışdır.

Sonda qonaq nazirə xatirə hədiyyəsi təqdim etmişdir.