Göyçayda Konstitusiya günü münasibətilə tədbir keçirilmişdir
Göyçayda, 12 noyabr (AZƏRTAC). Göyçay Dövlət İdarəetmə və Texnologiya Kollecində 12 noyabr - Konstitusiya Günü münasibətilə toplantı keçirilmişdir. AZƏRTAC xəbər verir ki, təhsil işçilərinin, idarə və təşkilatlarda çalışan gənclərin, tələbələrin və orta məktəb şagirdlərinin iştirakı ilə keçirilən tədbirdə çıxış edənlər müasir müstəqil Azərbaycan dövlətinin ilk konstitusiyasının qəbul edilməsinin tarixindən danışmış, bayram münasibətilə xalqımızı təbrik etmişlər.
Bildirilmişdir ki, ölkəmiz müstəqillik əldə etdikdən sonra yeni konstitusiyaya ehtiyac var idi. Bu məqsədlə ümummilli lider Heydər Əliyevin rəhbərliyi ilə xüsusi komissiya yaradılmış və sənədin layihəsi ümumxalq səsverməsinə çıxarılmışdır. 1995-ci il noyabrın 12-də Azərbaycan Respublikasının ilk Konstitusiyası xalqımız tərəfindən referendum yolu ilə qəbul olunmuşdur. Natiqlər bildirmişlər ki, ümummilli lider Heydər Əliyevin ən gözəl əsərlərindən biri sayılan, müasir demokratik amilləri əks etdirən konstitusiyamız Azərbaycan qanunlarının özəyini təşkil edir.
Bölmənin digər xəbərləri
