GÖYÇAYDA REGİONAL ÖZƏL BAYTARLIQ XİDMƏTİ MƏRKƏZİ FƏALİYYƏT GÖSTƏRƏCƏKDİR
Azərbaycan Hökuməti ilə Dünya Bankı arasında bağlanmış sazişə uyğun olaraq, bir neçə ildir ki, ölkəmizdə “Kənd təsərrüfatının inkişafı və kreditləşməsi” layihəsi həyata keçirilir.
Hazırda layihənin ikinci mərhələsi icra olunur. Bu mərhələ çərçivəsində Göyçay, Tovuz, Dəvəçi, İsmayıllı, Yevlax və Salyanda regional özəl baytarlıq xidməti mərkəzlərinin, 32 rayonda isə fərdi ərazi baytarlıq məntəqələrinin yaradılması, Dövlət Baytarlıq Xidmətinin müxtəlif sahələrinin inkişaf etdirilməsinə kömək göstərilməsi, yoluxucu xəstəliklərin aradan qaldırılması tədbirlərinin dəstəklənməsi nəzərdə tutulmuşdur.
Göyçay rayon baytarlıq idarəsindən AZƏRTAC-ın müxbirinə bildirmişlər ki, Göyçay, Kürdəmir, Ucar, Zərdab və Ağdaş rayonlarını əhatə edən Göyçay Regional Özəl Baytarlıq Xidməti Mərkəzi noyabrdan fəaliyyətə başlayacaqdır. Quruma rəhbərlik Göyçay rayon baytarlıq idarəsinin rəisi Ağadadaş Hacıyevə həvalə olunmuşdur.
Mərkəzdə işləmək üçün baytarlıq mütəxəssislərinin seçilməsi məqsədi ilə elan edilmiş müsabiqədə ali təhsilli baytar həkimlər və orta ixtisas təhsilli baytar texnikləri iştirak etmişlər. Onlar üçün Göyçay rayon baytarlıq idarəsində 10 günlük seminar-məşğələ keçirilmişdir. Sınaq imtahanlarında uğurla iştirak edən həkim və texniklərlə işə götürülmək haqqında müqavilələr bağlanmışdır.
Bölmənin digər xəbərləri
