Göygöl rayonunda qazlaşma səviyyəsi 95 faizdən çoxdur
Göygöl, 14 yanvar, Elcan Məmmədov, AZƏRTAC
2025-ci ildə Göygöl rayonu üçün sosial-iqtisadi inkişaf, infrastrukturun yenilənməsi, əhalinin rifahının yüksəldilməsi və ictimai həyatın canlandırılması baxımından əlamətdar olub. İl ərzində rayonda abadlıq-quruculuq işləri genişlənib, yol, qaz, elektrik, su, rabitə və sosial sahələr üzrə mühüm layihələr həyata keçirilib.
Göygöl Rayon İcra Hakimiyyətindən AZƏRTAC-ın bölgə müxbirinə bildirilib ki, Prezident İlham Əliyevin rəhbərliyi ilə həyata keçirilən dövlət proqramları çərçivəsində şəhər və kəndlərdə yolların əsaslı təmiri aparılıb, yaşıllaşdırma işləri görülüb, park və xiyabanlar yenilənib. İl ərzində şəhərdaxili küçə və səkilərdə 13 min kvadratmetrdən artıq sahəyə yeni asfalt örtüyü salınıb, yararsız yol hissələri bərpa edilib.
Rayonda enerji və kommunal infrastrukturun gücləndirilməsi istiqamətində də ardıcıl tədbirlər həyata keçirilib. 35/10 kV-luq yarımstansiyanın tikintisi başa çatdırılıb, yeni elektrik xətləri çəkilib, 18 yaşayış məntəqəsində SİP kabelləşmə tam və qismən təmin olunub. Qazlaşma səviyyəsi 95 faizdən artıq olub, yeni qaz xətləri çəkilib, sızmalar aradan qaldırılıb. Su təchizatı sahəsində yüzlərlə cari təmir işi aparılıb, yeni sututarlarının tikintisinə başlanılıb.
Rabitə və internet xidmətlərinin genişləndirilməsi məqsədilə 41 yaşayış məntəqəsində GPON texnologiyası tətbiq edilib. Bu sahə üzrə əldə olunan gəlir əvvəlki illə müqayisədə artıb.
Sosial sahələrdə də müsbət dinamika müşahidə olunub. Təhsil müəssisələrində monitorinqlər aparılıb, buraxılış imtahanlarının nəticələrində artım qeydə alınıb, şagirdlərin ali məktəblərə qəbulu yüksəlib. Səhiyyə sahəsində əhaliyə keyfiyyətli tibbi xidmət göstərilib, şəhid ailələri və qazilərə xüsusi diqqət ayrılıb.
Əhalinin dayanıqlı su təminatının təmin edilməsi məqsədilə “Bənövşəli” suqəbuledici mənbəyində 144 kubmetr həcmində sututarının tikinti işlərinə başlanılıb, 2026-cı ilin birinci rübünə işlərin yekunlaşdırlması nəzərdə tutulub. 8 ədəd subartezian quyusu əsaslı təmiri olunaraq istehlakçıların istifadəsinə verilib, 7 ədəd nasos stansiyasında cari təmir işləri görülüb. “Xanarx” kanalının Üçtəpə ərazisindən keçən hissəsində, üzərindəki hidrotexniki qurğularla birlikdə 370 poqonometr hissəsi beton üzlüyə alınıb. Mənbəyini “Xanarx” kanalından götürən Quşqara qapalı boru kəmərinin 1 kilometr hissəsində işlər başa çatdırılıb.
Həmçinin 2 min nəfər əhalinin yaşadığı 3 yaşayış məntəqəsini birləşdirən Göygöl rayonunun Göygöl–Topalhəsənli–Şəhriyar (8 km) – Zurnabad–Gəncə–Mollacəlilli avtomobil yolunun əsaslı təmiri ilə bağlı tədbirlər haqqında Azərbaycan Respublikası Prezidentinin Sərəncamına əsasən yolun əsaslı təmiri işlərinə başlanılıb.
Bölmənin digər xəbərləri
