GÜCLÜ KÜLƏK CƏNUB BÖLGƏSİNİN TƏSƏRRÜFATLARINA ZİYAN VURMUŞDUR
AZƏRTAC xəbər verir ki, mayın 30-da gecə saatlarından başlayaraq, cənub bölgəsində əsən güclü qərb küləyi sosial obyektlərə və təsərrüfatlara ziyan vurmuşdur.
Masallı və Yardımlı rayonlarında küləyin sürəti saatda 30-33 metr olmuşdur.
Təbi fəlakət nəticəsində Masallı şəhərinin Heydər Əliyev prospektindəki 44 nömrəli beşmərtəbəli evin, Bədirli kənd orta məktəbinin, Birinci Səmidxanlı kənd uşaq başçasının və Yeddioymaq kəndində fərdi evlərin dam örtükləri uçulmuş, rayonun 36 yaşayış məntəqəsində 45 elektrik dirəyi yıxılmış, 2 kilometr ərazidə elektrik naqilləri sıradan çıxmışdır.
Yardımlı rayonunda isə guclü külək 40 ədəd elektrik dirəyini aşırmışdır.
Hadisə zamanı 35/10 kilovoltluq Lənkəran-Lerik və Masallı-Yardımlı yarımstansiyalarında qısa qapanmalar olduğundan, cənub bölgəsinin bir sıra yaşayış məntəqələrində elektrik enerjisinin verilişində fasilələr yaranmışdır.
Rayonlarda fəaliyyət göstərən fövqəladə hallar komissiyaları təbii fəlakətin vurduğu ziyanın nəticələrini aradan qaldırmaq məqsədi ilə zəruri operativ tədbirlər həyata keçirmiş, nəticədə günün ikinci yarısında bölgənin əksər yaşayış məntəqələrində elektrik enerjisinin verilişi bərpa edilmişdir.
Bölmənin digər xəbərləri
