Günahı olmadan 35 il həbs cəzası çəkən qadın 3 milyon dollar təzminat alıb
Bakı, 30 avqust, AZƏRTAC
ABŞ-ın Nevada ştatının sakini günahsız yerə həyatının 35 ilini həbsxanada keçirib və buna görə məhkəmənin qərarı ilə 3 milyon dollar təzminat alıb.
AZƏRTAC “Daily Mail” nəşrinə istinadla xəbər verir ki, 1980-ci ildə 29 yaşlı Keti Vuds 19 yaşlı tələbə Mişel Mitçelin qətlində ittiham olunaraq 35 il həbs cəzasına məhkum edilib. Cinayət 1976-cı ildə baş verib. Bir müddət sonra Nevada ştatının məhkəməsi hökmü ləğv edib. Lakin 1984-cü ildə qadın təkrar mühakimə olunub və Ali məhkəmə hökmü qüvvədə saxlayıb.
Maddi sübutlar 1976-cı ildə mövcud olmayan müasir DNT analiz texnologiyaları vasitəsi ilə təkrar tədqiq edildikdən sonra Keti Vudsun təqsirsizliyi sübuta yetirilib. Əsl qatil, daha beş qadını öldürən Rodni Holbauer isə 2018-ci ildə ömürlük həbs cəzasına məhkum edilib.
Qeyd edək ki, bundan öncə Miçiqan ştatının hakimiyyət orqanları 46 il həbsxanada saxlanılan günahsız amerikalı Riçard Fillipsə 1,5 milyon dollar təzminat ödəmişdi.
Bölmənin digər xəbərləri
