GURCU-OSETİN MÜNAQİŞƏ ZONASINDA GÜCLÜ ATIŞMA OLMUŞDUR
AZƏRTAC-ın xüsusi müxbiri xəbər verir ki, avqustun 2-nə keçən gecə gürcü-osetin münaqişə zonasında güclü atışma baş vermişdir.
Gürcü sülhməramlılarının komandanı, general Mamuka Kuroşvilinin dediyinə görə, indiyədək münaqişə zonasında belə atışma olmamışdır. Osetinlər gürcülər yaşayan Tamaraşeni, Erqneti, Eredvi, Nikozi və sair kəndlərə, gürcü sülhməramlılarının postlarına atəş açmışlar. Nəticədə 8 nəfər dinc sakin, 1 nəfər polis yaralanmışdır. Zərərçəkənlər Qoridəki hərbi hospitala gətirilmişlər. Yaşayış evlərinə də ciddi ziyan dəymişdir.
Gürcü sülhməramlılarının komandanı cavab atəşi ilə osetinlərin susdurulduğunu, hələlik buraya əlavə canlı qüvvə və texnika yeritməyə ehtiyac olmadığını demişdir.
Osetinlər isə gürcülərin Sxinvalini atəşə tutduqlarını, nəticədə 6 nəfərin öldüyünü, 11 nəfərin yaralandığını bildirirlər.
Avqustun 2-də reinteqrasiya məsələləri üzrə dövlət naziri Temur Yakobaşvili hadisə yerinə getmiş, vəziyyətlə tanış olmuşdur. Onun separatçıların rəhbərləri ilə görüşəcəyi də ehtimal olunur.
Xatırladaq ki, son bir həftə ərzində gürcü-osetin münaqişə zonasında atışmalar səngimir, tərəflər isə bir-birini günahlandırırlar.
Bölmənin digər xəbərləri
