DÜNYA
GÜRCÜSTAN PARLAMENTİNƏ SEÇKİLƏRİN YEKUNLARI ELAN OLUNMUŞ, İLK İCLAS NOYABRIN 22-NƏ TƏYİN EDİLMİŞDİR
Beləliklə, partiya siyahıları üzrə 150 deputat mandatı uğrunda mübarizə başa çatmışdır. 85 deputat yeri uğrunda majoritar qaydada qalib deputatlar elan olunsa da, MSK bir neçə seçki dairəsində təkrar seçkilərin ikinci turunun nəticələrinin hələ məlum olmadığı bildirilmişdir.
İndiki seçkilərdə gələcəkdə parlament deputatlarının sayının 235-dən 150 nəfərədək azaldılmasına seçicilərin rəyi barədə sorğunun da baş tutduğu elan olunmuşdur.
Parlamentə düşmək imkanı olan 7-ci partiya - “Gürcüstanı sənaye xilas edəcək” partiyası isə məhkəməyə müraciət etməyi qərara almışdır. Partiya liderinin sözlərincə, səslərin hesablanması zamanı yol verilmiş səhvlər onları bu imkanlardan məhrum etmişdir.
İlkin məlumata görə, hələlik Gürcüstan parlamentinə 4 nəfər azərbaycanlı deputat seçilmişdir. Proporsional seçki sistemi üzrə “Yeni Gürcüstan uğrunda” blokdan Mübariz Qarayev, Dirçəliş Partiyasından Fəzail Əliyev, “Milli hərəkat”dan Kamil Muradxanov, mojoritar sistem üzrə isə Adil Cəfərov deputat seçilmişlər.
Gürcüstan Konstitusiyasına müvafiq olaraq Prezident Eduard Şevardnadzenin sərəncamı ilə parlamentinin ilk iclası noyabrın 22-də keçiriləcək və təşkilat məsələsinə baxılacaqdır.
Radikal müxalifət parlamentin iclaslarında iştirak etməyəcəyini elan etmişdir və Qərbi Gürcüstanda mitinqlər keçirir. Məlum olduğu kimi, onlar Tbilisidə parlament binası qarşısında bir həftəlik mitinq keçirdikdən sonra iki gün fasilə vermiş və Dirçəliş Partiyasının tərəfdarları həmin meydanı tutmuşlar. Artıq dördüncü gündür ki, burada radikal müxalifətin qeyri-konstitusiya tələblərinə qarşı etiraz aksiyası davam edir. “Milli hərəkat”ın lideri Mixail Saakaşvili itirdiyi meydanın əvəzinə Prezident aparatının qarşısında mitinq keçirmək niyyətindədir. O, Qərbi gürcüstanlıları buraya çağırır. Hələlik çağırışa nə qədər adamın qoşulacağı məlum deyildir. Lakin bir həqiqət var ki, əgər onun bu niyyəti baş tutmasa, o, burada da siyasi reytinqini itirəcəkdir.
Hər ehtimala qarşı Gürcüstan iqtidarı Prezident aparatının mühafizəsini gücləndirmişdir. Polis və daxili qoşun hissələri buranı əhatəyə almışlar.