Gürcüstanda “donuz qripi”nin yayılmasında azalma müşahidə olunur
Tbilisi, 30 yanvar, AZƏRTAC
Gürcüstanda qrip virusunun yayılmasında azalma müşahidə olunur. Son günlər bu xəstəliklə əlaqədar təcili tibbi yardıma müraciət edənlərin və xəstəxanalarda müalicə olunanların sayının azalması bunu deməyə əsas verir.
AZƏRTAC xəbər verir ki, bu barədə mətbuata Gürcüstanın Xəstəliklərə Nəzarət və İctimai Sağlamlıq Milli Mərkəzinin rəhbəri Amiran Qamkrelidze bildirib.
Mərkəzin rəhbəri deyib ki, A (H1N1) virusunun da yayılmasında azalma müşahidə olunur. O, bununla belə, ölkədə “donuz qripi” adlandırılan A (H1N1) virusundan 20 nəfərin öldüyünü etiraf edib.
A.Qamkrelidze deyib ki, “donuz qripi” ilə bağlı dəqiqləşdirilmiş məlumatlar qrip mövsümünün sonunda açıqlanacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
