Gürcüstanın Anaklia dərin dəniz limanı Azərbaycan və Qazaxıstanın mövqeyini möhkəmlədəcək
Bakı, 30 yanvar, AZƏRTAC
Gürcüstan tikintisi davam edən və ümumi dəyəri 2,5 milyard dollar olan Anaklia dərin dəniz limanı qədim İpək yolu marşrutunda Azərbaycan və Qazaxıstanın mövqeyini möhkəmlədəcək.
AZƏRTAC xəbər verir ki, bunu Anadolu agentliyinə müsahibəsində Anaklia konsorsiumunun baş direktoru Keti Boçorişvili söyləyib. Onun sözlərinə görə, bu liman ildə 100 min ton yükdaşıma imkanına malik olacaq. İlkin mərhələsi 2020-ci ildə başa çatdırılacaq layihə İpək yolunu canlandıracaq layihələrin Gürcüstan qolunu təşkil edir.
K.Boçorişvili əlavə edib ki, Trans-Xəzər dəhlizində həyata keçirilən layihələr Gürcüstan, Azərbaycan və Qazaxıstanın mövqeyini daha da möhkəmləndirəcək. Konsorsiumun baş direktoru diqqətə çatdırıb ki, hazırda dəniz dibinin dərinləşdirilməsi işləri başa çatıb və 9 mərhələdən ibarət olan layihənin ilk mərhələsi 660 milyon dollara başa gəlib.
Xatırladaq ki, 2017-ci ilin noyabrında Bakı Beynəlxalq Dəniz Ticarət Limanı ilə Gürcüstanın Anaklia Dərin Dəniz Limanı arasında əməkdaşlıq haqqında memorandum imzalanıb. Memorandumda iki ölkənin dəniz limanları arasında informasiya mübadiləsi, ticarət dövriyyəsinin artırılması və əməkdaşlığın genişləndirilməsi məsələləri nəzərdə tutulub.
Bölmənin digər xəbərləri
