SİYASƏT
GÜRCÜSTANIN YÜKSƏK MÜKAFATINA LAYİQ GÖRÜLMÜŞDÜR
Qardabanidəki Müqəddəs Nemətov adına 3 nömrəli Azərbaycan orta məktəbinin müəllimləri Hidayət Yusifov və Telman Həsənov, rayonun Qaracalar kənd orta məktəbinin müəllimi Alı Sofiyev gənc nəslin təlim-tərbiyəsində xidmətlərinə görə Gürcüstan Prezidenti Eduard Şevardnadzenin fərmanı ilə “Şərəf” ordeninə layiq görülmüşlər.
Yüksək mükafatın təqdim edilməsi münasibətilə rayon icra hakimiyyətində təhsil işçilərinin və ictimaiyyətin nümayəndələrinin iştirakı ilə tədbir keçirilmişdir. İcra hakimiyyətinin başçısı Nuqzar Periaşvili tədbiri açaraq, ölkə başçısının təltif olunanlara göndərdiyi təbrik məktubunu oxudu və onlara gələcək fəaliyyətlərində uğurlar arzuladı.
Rayon təhsil şöbəsinin müdiri Tengiz Tumanişvili, onun müavini Zabit Hüseynov, 3 nömrəli məktəbin direktoru Firdovsi İsgəndərov və başqaları çıxış edərək, “Şərəf” ordenli pedaqoqların şərəfli müəllim adını daha da uca tutmaq, şagirdlərin vətənpərvərlik ruhda tərbiyə olunması üçün böyük səylə çalışdıqlarından danışdılar.
Təltif olunanlar onların əməyinə yüksək qiymət verildiyinə görə Gürcüstan Prezidentinə təşəkkürlərini bildirdilər.
Şahismayıl Məmmədov
AZƏRTAC-ın xüsusi müxbiri
Qardabani