Hanoy Ticarət və Turizm Kollecinin rektoru: Vyetnamda Novruz bayramı böyük maraqla qarşılanır
Bakı, 30 iyul, AZƏRTAC
Vyetnamda Azərbaycanın mədəniyyəti və milli mətbəxinin tanıdılması istiqamətində müxtəlif tədbirlər keçirilir.
AZƏRTAC xəbər verir ki, bu fikri Vyetnamın Hanoy Ticarət və Turizm Kollecinin rektoru Trinh Tri Thu Ha BDU-da “Vyetnam – kimliyin melodiyası” adlı musiqili-mədəni proqram çərçivəsində jurnalistlərə açıqlamasında söyləyib.
“Bakıda keçirilən “Vyetnam günləri”ndə iştirak etmək üçün buraya gəlmişəm. Üçüncü dəfədir ki, Bakıya gəlirəm. Bizim nümayəndəlik isə ilk dəfədir “Vyetnam günləri”ni Bakıda təşkil edib. Kollecimiz turizm və ticarət sahəsində təhsil verir. Azərbaycanın Vyetnamdakı səfirliyi ilə bir çox tədbirlər keçirmişik. Vyetnamda dörd dəfə Novruz bayramı təşkil etmişik. Kollecimizə Azərbaycan icmasının nümayəndələrini və bir çox beynəlxalq qonaqları dəvət edirik. Vyetnamlılar Novruz bayramından zövq alır, ona böyük maraq göstərir və bu bayramı çox sevirlər”, – deyə rektor bildirib.
Trinh Tri Thu Ha qeyd edib ki, kollecdə Azərbaycanla bağlı digər tədbirlər də təşkil olunur: “Turizm günləri və kulinariya tədbirləri keçiririk. Azərbaycanlı aşpazları kollecə dəvət edirik ki, tələbələrimizə yemək bişirməyi, kabab hazırlamağı öyrətsinlər. Bir çox tələbələrimiz qoyun və mal ətindən kabab hazırlaya bilir. Biz çoxlu insanları dəvət edirik ki, Azərbaycan yeməklərini dadsınlar. Bu, çox maraqlıdır”.
Bölmənin digər xəbərləri
