Həmrəylik Günü soydaşlarımız arasında milli birliyin formalaşmasında mühüm rola malikdir
Tokio, 31 dekabr, AZƏRTAC
31 Dekabr - Dünya Azərbaycanlılarının Həmrəylik Günü müxtəlif ölkələrdə yaşayan soydaşlarımız arasında milli birliyin formalaşmasında mühüm rola malikdir.
Bu sözləri AZƏRTAC-ın Yaponiyadakı müxbirinə müsahibəsində Azərbaycan-Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntər deyib.
X.Kələntər bildirib ki, 1991-ci il dekabrın 16-da, o zaman Naxçıvan Muxtar Respublikası Ali Məclisinin sədri, sonradan müstəqil Azərbaycan Respublikasının Prezidenti olmuş ümummilli lider Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan edib. Artıq 25 ildir ki, 31 dekabr dünyanın müxtəlif ölkələrində yaşayan həmvətənlərimiz tərəfindən Dünya Azərbaycanlılarının Həmrəylik Günü kimi böyük ehtiramla qeyd olunur. Bu gün Azərbaycan diasporunun üzvləri üçün ən mühüm bayramlardan birinə çevrilib.
2016-cı ilin dünyada davam edən qlobal gərginliyə, iqtisadi və siyasi böhrana baxmayaraq, xalqımız üçün uğurlu olduğunu qeyd edən X.Kələntər deyib ki, yola salmaqda olduğumuz bu il tarixə həm də mühüm nailiyyətlərlə düşüb. Cari ilin aprel ayında şanlı Azərbaycan Ordusu düşmənə cavab zərbəsi endirərək 200 hektara yaxın ərazimizi, strateji əhəmiyyətli yüksəklikləri azad edib. Bu, atəşkəsdən sonra Dağlıq Qarabağ münaqişəsində xalqımızın ilk qələbəsidir. Arzu edirəm ki, qarşıdan gələn Yeni ildə belə qələbələrimizin sayı daha çox olsun, işğal altında olan torpaqlarımız mənfur düşmənin tapdağından azad edilsin.
X.Kələntər qeyd edib ki, bu ildə ikinci uğurumuz idmançılarımızın Rio Yay Olimpiya Oyunlarında qazandığı rekord sayda medallarla bağlıdır. İlk dəfə olaraq, idmançılarımız yüksək peşəkarlıq nümunəsi göstərərək Vətənə 18 medalla geri dönüblər. Mən deyərdim ki, bu, bütün dünya üzrə ən yaxşı nəticədir. Əgər Azərbaycanın göstəricilərini iri dövlətlərin ərazisi və əhalisinin sayı ilə müqayisədə götürsək, həqiqətən də idmançılarımızın çox böyük uğurunun şahidi olarıq.
Cari ilin iyun ayında Bakıda keçirilən “Formula-1” Avropa Qran-pri yarışları Azərbaycanın bütün dünyada, o cümlədən Yaponiyada daha geniş tanınmasında mühüm rol oynadı. Yaponiyada bu yarışlara olan böyük maraq həm də diqqətləri Azərbaycana yönəltdi. Yaponiyalı “Formula-1” azarkeşləri yüksək səviyyədə təşkil edilən yarışları böyük maraqla izlədilər. Bu yarışlar ölkəmizin uzaq Yaponiyada daha yaxşı tanınmasına böyük təsir göstərdi.
“2016-cı il həm də tarixə Dünya Azərbaycanlılarının IV qurultayı ilə daxil olub. Dünyanın hər yerindən doğma Bakıya toplaşan həmvətənlərimiz Azərbaycanın tarixinin, mədəniyyətinin beynəlxalq aləmdə daha geniş tanıdılması üçün yeni yolların axtarılması istiqamətində müzakirələr apardılar. Dünyada müstəqil xarici siyasət yeridən Azərbaycan dövlətinin imicinin daha da artması üçün rəy və təkliflərini bildirdilər. Yaponiyada yaşayan azərbaycanlılar da Prezident İlham Əliyevin diasporumuzun qarşısında qoyduğu vəzifələrin uğurlu icrası məqsədilə var gücləri ilə çalışırlar. Əsasən ziyalılardan ibarət olan Azərbaycan-Yaponiya Dostluq Mərkəzinin üzvləri müdrik xalqımızın uca adının bu Gündoğar ölkədə daha geniş tanıdılması üçün əlindən gələni edir. Azərbaycan ilə Yaponiya arasında əlaqələr son illər intensivləşən qarşılıqlı rəsmi səfərlər, birgə iqtisadi layihələr fonunda xeyli inkişaf edib. İki dost ölkə arasında regionlararası əməkdaşlığın inkişafı istiqamətində ardıcıl, məqsədyönlü iş aparılır. Yaponiyadan Azərbaycana, eyni zamanda, doğma vətənimizdən bu Gündoğar ölkəyə qarşılıqlı turist səfərlərinin də sayı xeyli artıb. Azərbaycan adı artıq Yaponiyada dinamik inkişafın, sabitlik və tərəqqinin, sülh və dostluq əlaqələrinin rəmzinə çevrilib. Bu, bizi, Yaponiyada yaşayan azərbaycanlıları ürəkdən sevindirir.
Dünya Azərbaycanlılarının Həmrəylik Günü ilə bağlı fikirlərini bölüşən JGC şirkətinin mütəxəssisi Emil İlyasov da xalqımızı bayram münasibətilə təbrik edərək, yeni ildə firavanlıq və uğurlar arzulayıb. Qeyd edib ki, milli birliyimiz nəticəsində xalqımız 2017-cı ildə də böyük uğurlara imza atacaq. E.İlyasov əmin olduğunu bildirib ki, məhz milli birlik nəticəsində qazanılan nailiyyətlər bundan sonra da davam edəcək. Ötən ilin mühüm hadisələri sırasında aprel döyüşlərində ordumuzun mühüm qələbəsinə diqqət çəkən E.İlyasov işğal altında olan torpaqlarımızın tezliklə azad ediləcəyinə inandığını bildirib.
Həmrəylik Günü münasibətilə xalqımızı təbrik edənlər arasında Yaponiyanın “Rakuten” şirkətinin meneceri, bodibilder üzrə Yaponiya beşincisi Fərhad Ağayev də var. O bildirib ki, bu Gündoğar ölkədə yaşayan soydaşlarımız Vətəndən nə qədər uzaqda olsalar da ürəkləri həmişə Azərbaycanladır. Gücümüzün milli birlikdə olduğunu vurğulayan F.Ağayev bayramlar münasibətilə təbriklərini çatdırıb, xalqımıza yeni ildə daha böyük uğurlar arzulayıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
