HƏMVƏTƏNİMİZƏ YUBİLEY MEDALI TƏQDİM OLUNMUŞDUR
İlqar Hacıyev bu mükafata səmərəli ictimai və xeyriyyəçilik fəaliyyətinə görə layiq görülmüşdür. Bunu mükafatı təqdimetmə mərasimində Rusiya Silahlı Qüvvələri Fəhlə və Qulluqçularının Həmkarlar İttifaqları Federasiyasının sədri Nikolay Kalmıkov bildirmişdir. O demişdir ki, İlqar Hacıyev Azərbaycanla Rusiya arasında əlaqələrin möhkəmlənməsinə və inkişafına töhfə vermiş, ehtiyacı olan rusiyalılara daim yardım göstərmişdir.
Rusiya Müstəqil Həmkarlar İttifaqları Baş Şurasının təsis etdiyi “Rusiya həmkarlar ittifaqlarının 100 ili” yubiley medalı yüksək mükafatdır və əmək hüquqlarının müdafiəsi, hüquq qaydalarının və qanunçuluğun möhkəmləndirilməsi, cəmiyyətdə sabitliyin bərpa olunması ilə bağlı sahələrə konkret töhfə vermiş, nailiyyətlər qazanmış şəxslərə verilir.
İlqar Hacıyev ona göstərilən yüksək şərəfə görə minnətdarlığını bildirərək demişdir ki, bu mükafat təkcə şəxsən ona deyil, ÜAK-ın Moskva regional şöbəsinə, habelə bütün Konqresə göstərilən böyük etimadın göstəricisidir.
İ.Hacıyev Bakıda keçirilən Dünya azərbaycanlılarının II qurultayından aldığı təəssüratını bölüşərək vurğulamışdır ki, hər bir azərbaycanlı böyük millətin təmsilçisi olmaqdan qürur duymalı, eyni zamanda, yaşadığı ölkənin layiqli vətəndaşına çevrilməli, onun qayda-qanunlarına əməl etməli, xalqının adətlərinə hörmətlə yanaşmalıdır. Azərbaycan Prezidenti İlham Əliyev dünya azərbaycanlılarının qurultayında bizi məhz buna çağırmışdır.
Bölmənin digər xəbərləri
