Heydər Əliyev Beynəlxalq Aeroportu gücləndirilmiş iş rejimində çalışacaq
Bakı, 7 noyabr, AZƏRTAC
Heydər Əliyev Beynəlxalq Aeroportu noyabrın 8-dən 12-dək davam edəcək qeyri-iş günlərində sərnişinlərin maksimum rahatlığını və təhlükəsizliyini təmin etmək məqsədilə gücləndirilmiş iş rejimində fəaliyyət göstərəcək.
AZƏRTAC Heydər Əliyev Beynəlxalq Aeroportunun yaydığı məlumata istinadən xəbər verir ki, bu müddət ərzində gözlənilən sərnişin axınının artması ilə əlaqədar Bakı hava limanının bütün xidmətləri tərəfindən onlara çevik və operativ xidmət göstərilməsi üçün lazımi tədbirlər həyata keçirilib.
Sərnişinlərə reysə qeydiyyat və digər rəsmi prosedurları vaxtında keçmək üçün uçuşdan ən azı 2 saat əvvəl hava limanına gəlmələri və aeroportun rəsmi saytında www.airport.az uçuşların gediş-gəliş vaxtını operativ şəkildə izləmək tövsiyə olunur.
Qeyd edək ki, Heydər Əliyev Beynəlxalq Aeroportundan sərnişinlərə 34 aviaşirkətin xidmət göstərdiyi 80-ə yaxın istiqamətə səyahət etmək imkanı təqdim edilir.
Bölmənin digər xəbərləri
