“HEYDƏR ƏLİYEV VƏ AZƏRBAYCAN DÖVLƏTÇİLİYİ” MÖVZUSUNDA ELMİ-PRAKTİKİ KONFRANS
AZƏRTAC xəbər verir ki, mayın 2-də Təhsil Nazirliyində xalqımızın ümummilli lideri, dünya şöhrətli siyasi xadim Heydər Əliyevin anadan olmasının 85 illiyinə həsr edilmiş “Heydər Əliyev və Azərbaycan dövlətçiliyi” mövzusunda elmi-praktiki konfrans keçirilmişdir.
Nazir Misir Mərdanov, ulu öndər Heydər Əliyevin müstəqil dövlətimizin formalaşmasında, möhkəmlənməsində və dünyada tanınmasında tarixi xidmətlərindən bəhs etmiş, təhsilimizə və müəllimlərə diqqət və qayğısından danışmışdır. Onun təhsilimizin inkişafı ilə bağlı imzaladığı fərman və sərəncamların əhəmiyyətini qeyd edən nazir, ölkəmizdə həyata keçirilən təhsil islahatlarının uğurlu nəticələrini, məktəblərdə əldə olunan nailiyyətləri konkret faktlarla diqqətə çatdırmışdır.
Qeyd olunmuşdur ki, son illər respublikamızda müasir tələblərə cavab verən yeni-yeni məktəb binaları inşa edilmiş, mövcud təhsil müəssisələri əsaslı təmir olunmuşdur.
Sonra Bakı Dövlət Universitetinin rektoru, Milli Məclisin deputatı, akademik Abel Məhərrəmov, Azərbaycan Dillər Universitetinin rektoru, Milli Məclisin beynəlxalq münasibətlər və parlamentlərarası əlaqələr daimi komissiyasının sədri, professor Səməd Seyidov və digər natiqlər ümummilli liderimiz Heydər Əliyevin Vətən, xalq qarşısındakı xidmətlərindən, zəngin dövlət idarəçilik təcrübəsindən danışmış, ulu öndərimizin siyasi irsinin dərindən öyrənilməsinin zəruriliyini vurğulamışlar.
######
Bölmənin digər xəbərləri
