Hikmət Quliyev: Azərbaycan-Özbəkistan folklorşünaslıq əlaqələri daha geniş elmi layihələrə çevriləcək
Bakı, 25 avqust, AZƏRTAC
Azərbaycan Milli Elmlər Akademiyasının (AMEA) Folklor İnstitutu ilə Özbəkistan Respublikası Elmlər Akademiyasının Özbək Dili, Ədəbiyyatı və Folkloru İnstitutu arasında elmi əməkdaşlığın yeni istiqamətlər üzrə inkişaf etdirilməsi nəzərdə tutulur.
Bu fikirləri AZƏRTAC-a açıqlamasında AMEA Folklor İnstitutunun direktoru filologiya elmləri doktoru Hikmət Quliyev deyib.
O qeyd edib ki, bu ilin noyabr ayında iki elmi müəssisənin birgə təşkilatçılığı ilə “Türk xalqları folklorunun müqayisəli öyrənilməsinin problemləri” mövzusunda beynəlxalq elmi konfransın keçirilməsi planlaşdırılır. Bununla yanaşı, 2027–2028-ci illərdə azərbaycanlı və özbək folklorşünas alimlərin birgə səyləri ilə iki xalqın şifahi xalq yaradıcılığı materialları əsasında müqayisəli folklorşünaslığa dair monoqrafiyanın hazırlanması nəzərdə tutulur. Hesab edirik ki, bu layihə iki elmi məktəb arasında əməkdaşlığın konkret elmi məhsula çevrilməsi baxımından xüsusi əhəmiyyət daşıyır. Hikmət Quliyev qeyd edib ki, Azərbaycan Respublikasının Prezidenti İlham Əliyevin və Özbəkistan Respublikasının Prezidenti Şavkat Mirziyoyevin müəyyən etdiyi strateji kursa uyğun olaraq, Azərbaycan–Özbəkistan münasibətləri qarşıdakı illərdə daha geniş məzmun qazanacaq: “Bu prosesdə folklorşünas alimlər də öz üzərlərinə düşən elmi missiyanı məsuliyyətlə həyata keçirməyə hazırdırlar. Məqsədimiz Azərbaycan və Özbəkistan folklorşünaslığını ortaq elmi platformada bir araya gətirən, müqayisəli tədqiqatları, ortaq sahə çalışmalarını, rəqəmsal arxivləşdirməni və yeni nəsil tədqiqatçıların hazırlanmasını əhatə edən davamlı elmi əməkdaşlıq modeli formalaşdırmaqdır”.
İnstitut direktoru vurğulayıb ki, Azərbaycan və özbək xalqlarının folkloru xalqların keçmişini birləşdirən zəngin yaddaş olmaqla yanaşı, gələcəyin birgə qurulması baxımından da mühüm mədəni resursdur: “Azərbaycan və Özbəkistan arasında siyasi müstəvidə “əbədi dostluq” adlandırılan münasibətlərin mədəni yaddaşdakı kökləri də əbədidir. Bu yaddaşın ən canlı daşıyıcılarından biri olan folklor xalqlarımızın yalnız keçmişini öyrənməyə deyil, ortaq gələcəyimizin mədəni əsaslarını daha da möhkəmləndirməyə xidmət edir”.
Hikmət Quliyev əminliklə bildirib ki, qarşılıqlı etimad, ortaq tarixi-mədəni köklər və dövlət başçılarının siyasi iradəsi Azərbaycan–Özbəkistan folklorşünaslıq əlaqələrinin daha geniş elmi, mədəni və institusional layihələrə çevrilməsinə imkan verəcək. Onun sözlərinə görə, bu əməkdaşlıq, eyni zamanda, ümumtürk mədəni irsinin sistemli şəkildə öyrənilməsinə mühüm töhfə verəcək. Qarşıdakı layihələr yalnız ayrı-ayrı elmi tədbirlərlə məhdudlaşmayacaq, Azərbaycan və Özbəkistan folklorşünasları arasında uzunmüddətli və sistemli əməkdaşlığın əsasını təşkil edəcək. Onun sözlərinə görə, ortaq tədqiqatların aparılması, folklor nümunələrinin qarşılıqlı şəkildə öyrənilməsi və nəşri, elmi məlumat bazalarının yaradılması, gənc tədqiqatçıların birgə layihələrə cəlb olunması iki ölkənin folklorşünaslıq məktəbləri arasında əlaqələrin daha da möhkəmlənməsinə xidmət edəcək.
Müxbir - Tünzalə Arazlı
Bölmənin digər xəbərləri
