HİV/AİDS-LƏ MÜBARİZƏDƏ VƏTƏNDAŞ CƏMİYYƏTİNİN İMKANLARI MÜZAKİRƏ OLUNMUŞDUR
AZƏRTAC xəbər verir ki, BMT-nin İnkişaf Proqramı hüquqşünaslar üçün HİV/AİDS epidemiyası ilə mübarizə və insan hüquqlarına dair təlim keçirmişdir. Tədbirə dövlət orqanlarının və qeyri-hökumət təşkilatlarının nümayəndələri qatılmışlar.
Təlim çərçivəsində HİV/AİDS epidemiyası ilə qarşıdurmada vətəndaş cəmiyyətinin imkanlarının genişləndirilməsi məsələləri müzakirə olunmuşdur.
Qeyd edilmişdir ki, insanın immun çatışmazlığı virusunun törətdiyi xəstəlik (AİDS) bəşəriyyətə ölüm gətirən bir bəla kimi, bu gün dünyada, eyni zamanda, respublikamızda çox böyük narahatlıq doğuran problemə çevrilmiş və sürətlə yayılmaqdadır. Statistik göstəricilərə görə, ölkəmizdə bu təhlükəli xəstəliyə yoluxmuş insanların sayı artır.
Tədbirdə iştirak etmiş Ombudsman Aparatının əməkdaşları hər kəsin öz sağlamlığını qorumaq və tibbi yardım almaq hüququ olduğunu, ölkəmizdə vətəndaşların sağlamlığının mühafizəsi və onlara tibbi xidmət göstərilməsi, əhalinin sosial müdafiəsi istiqamətində zəruri tədbirlər görüldüyünü, sağlam həyat tərzinin bərqərar edilməsi üçün respublikamızda müxtəlif tədbirlərin keçirildiyini bildirmişlər.
