“Hövsan” yaşayış kompleksi layihəsi öz möhtəşəmliyi ilə seçiləcəkdir
Bakı, 13 noyabr (AZƏRTAC). “Hövsan” yaşayış kompleksi yalnız Azərbaycanda deyil, həm də MDB-də bənzərsiz layihədir. Kompleksin tikiləcəyi sahə kifayət qədər genişdir və Bakı şəhərinin urbanizasiya ilə bağlı problemlərinin aradan qaldırılmasına xidmət edəcəkdir.
Layihəni həyata keçirəcək “AS Group İnvestment” şirkətinin mətbuat xidmətindən AZƏRTAC-a bildirmişlər ki, ümumi sahəsi 330 hektar olacaq kompleksin tikintisinin ilk mərhələsində, 50 hektar sahədə orta mərtəbəli yaşayış binaları inşa ediləcəkdir. Buraya 1,2 və 3 otaqlı 3 min 640 tam təmirli mənzil daxildir.
Layihənin üstün cəhətlərindən biri də yaşayış kompleksinin hava limanına yaxın yerləşməsi, eləcə də avtomagistral və dəmir yolu vasitəsilə şəhərin mərkəzi ilə qısa zamanda əlaqənin yaradılmasıdır.
Kompleksdə ticarət, biznes, tibb və əyləncə mərkəzlərinin, innovativ və yüngül sənaye müəssisələrinin inşası da planlaşdırılmışdır. Bundan əlavə, sakinlərin istirahəti üçün yaşıllıq zonaları və süni gölməçələr yaradılacaq, yerüstü metro fəaliyyət göstərəcəkdir.
Layihənin əsas obyektlərindən biri də “Disneyland” layihəsi əsasında tərtib olunmuş atraksion parkı olacaqdır.
Bölmənin digər xəbərləri
