İçərişəhərdə Uşaqların Beynəlxalq Müdafiəsi Günü qeyd olunub
Bakı, 1 iyun, AZƏRTAC
İyunun 1-də Uşaqların Beynəlxalq Müdafiəsi Günü ilə əlaqədar Qoşa Qala meydanında İçərişəhər Dövlət Tarix-Memarlıq Qoruğu İdarəsinin yeni layihəsi çərçivəsində uşaq musiqi-rəqs folklor ansambllarının iştirakı ilə “Nağara-şou” adlı konsert keçirilib. Meydanda açılan bayram yarmarkasında suvenirlər, əl işləri, milli mətbəximizin ləziz təamları və s. nümayiş etdirilib. Burada yaradılmış xüsusi guşədə arzu edən hər kəs əllərini xına ilə çəkilən naxışlarla bəzədə bilər.
AZƏRTAC xəbər verir ki, “Nağara-şou” layihəsi oktyabrın 28-dək davam edəcək. Bu müddətdə hər şənbə günü saat 18.00-da Qoşa Qala meydanında, saat 19.00-da isə Qız Qalası meydanında paytaxt sakinləri və qonaqlar üçün konsertlər təşkil olunacaq.
Bölmənin digər xəbərləri
