İƏT Modeli təhsil layihəsi onlayn qaydada işini davam etdirir
Bakı, 1 may, AZƏRTAC
Bakıda yerləşən İslam Əməkdaşlıq Təşkilatı (İƏT) Gənclər Forumunun Avrasiya üzrə Regional Mərkəzinin təşkilatçılığı və Azərbaycanın Gənclər və İdman Nazirliyinin tərəfdaşlığı ilə həyata keçirilən İƏT Modeli təhsil layihəsi artıq üçüncü həftəsini yekunlaşdıraraq onlayn qaydada öz işini davam etdirir.
AZƏRTAC xəbər verir ki, bu həftə Azərbaycan Təhsil Nazirliyinin Beynəlxalq Əməkdaşlıq Departamentinin müdiri Nicat Məmmədli və Azərbaycanın Türkiyədəki səfiri Xəzər İbrahim layihənin yerli və beynəlxalq iştirakçıları üçün nəzərdə tutulan müvafiq mühazirələrlə çıxış ediblər. Beynəlxalq və yerli auditoriyanın maraqla qarşıladığı hər iki mühazirə ingilis dilində oxunub və natiqlər mühazirələrin sonunda layihə iştirakçılarının suallarını cavablandırıblar.
Layihənin formatına uyğun olaraq, qonaq səfir qismində layihədə iştirak edən səfir Xəzər İbrahim çıxışında pandemiya dövründə səfirliyin fəaliyyətindən və Türkiyədəki həmvətənlərimizlə bağlı görülən işlərdən, eləcə də postkoronavirus dövründə dövlətlərarası münasibətlərin perspektivlərindən və beynəlxalq təşkilatların gələcəkdə oxşar vəziyyətlərdə göstərəcəyi gözlənilən davranışlarından bəhs edib. Səfir, həmçinin pandemiya dövründə Türkiyə-Azərbaycan münasibətlərinin “bir millət, iki dövlət” prinsipi çərçivəsində davam etdiyini vurğulayaraq, yaranmış böhranın aradan qaldırılması istiqamətində qarşılıqlı məsləhətləşmələr və yardım siyasətinin uğurla həyata keçirildiyini bildirib.
Layihənin bu həftəki buraxılışında mütəxəssis kimi iştirak edən Nicat Məmmədli “Müasir qlobal nizam və postpandemiya gözləntiləri” mövzusunda çıxış edib. O, dünya düzəninin tarixi aspektlərinə nəzər salaraq, Vestfal sistemi formalaşandan bəri dünyada gedən qlobal proseslərin mahiyyətindən bəhs edib. N.Məmmədli çıxışında, həmçinin Avropada yoluxucu xəstəliklərin tarixindən bəzi misallar gətirərək, səhiyyə sahəsində tarixən yeni institutların yaranması məsələsinə toxunub və hazırda dünyanı narahat edən koronavirus pandemiyasının bundan sonra doğuracağı çağırış və proseslərdən danışıb.
İslam iqtisadiyyatı üzrə mütəxəssis Anar Yusifzadə iştirakçılara İslam bankçılığının əsas prinsipləri, zəkat, dində pul dövriyyəsi, faiz məsələsi, iqtisadiyyata yatırımlar, mülkiyyətin formaları, İslam qaydalarına uyğun ticarətin aparılması haqqında ətraflı məlumat verib. O, müasir şərtlər nəzərə alınmaqla, İslam iqtisadiyyatı kontekstində qadağan olunan və icazə verilən bank əməliyyatları barədə söz açıb.
Xatırladaq ki, “İƏT Modeli - Beynəlxalq Münasibətlər Akademiyası” təhsil proqramı artıq 10 ildir uğurla həyata keçirilməkdədir. Bu il pandemiya səbəbindən proqramın bütün mühazirələri onlayn rejimdə, yalnız yerli dinləyicilər üçün Azərbaycan, yerli və beynəlxalq iştirakçılar üçün ingilis dilində aparılır. Son üç həftənin onlayn yayımlanan mühazirələrinin ümumi baxış sayı artıq 40 minə yaxınlaşıb. Proqramın 2020-ci il mərhələsi daha iki həftə onlayn rejimdə davam edəcək və sonda həm yerli, həm də beynəlxalq səviyyədə İƏT Xarici İşlər Nazirləri Konfransının simulyasiyası ilə yekunlaşacaq.
Bölmənin digər xəbərləri
