II XƏZƏR NEFT-QAZ TİCARƏT-NƏQLİYYAT KONFRANSI İŞİNİ DAVAM ETDİRMİŞDİR
AZƏRTAC xəbər verir ki, Bakıda keçirilən beynəlxalq II Xəzər neft-qaz-ticarət-nəqliyyat konfransı aprelin 24-də işini davam etdirmişdir.
Təşkilatçıları Azərbaycan Dövlət Neft Akademiyası və Böyük Britaniyanın “Confidence Energy” şirkəti olan tədbirdə dünyanın 20-dən çox ölkəsindən 150-dək mütəxəssis iştirak edir. Məqsəd Xəzər regionunda karbohidrogen ehtiyatlarının istehsalı və ixracı ilə bağlı daşımalar zamanı ortaya çıxan tendensiyalar ətrafında fikir mübadiləsi aparmaqdır.
Konfransda bildirilmişdir ki, Avropa ölkələrinin və ABŞ-ın enerji təhlükəsizliyində Azərbaycan da daxil olmaqla regionun neft-qaz istehsalçılarının rolu artmaqdadır. Son dövrlərdə isə karbohidrogen ehtiyatlarının mənimsənilməsi və nəqli ilə bağlı rəqabətin gücləndiyi vurğulanmışdır. Bildirilmişdir ki, hazırda dünya bazarında neftin qiymətinin görünməyən həddə çatması da mövzunun aktuallığını artırmışdır.
Konfransın ikinci günü mövzu ilə bağlı 11 təqdimat keçirilmiş, Azərbaycan, İran, Qazaxıstan və Rusiyadan olan rəsmilərin, eyni zamanda, CGES, Argus Media Grup, İntertek və Platss kimi şirkətlərin mütəxəssislərinin karbohidrogen ehtiyatlarının mənimsənilməsi və nəqli ilə bağlı mülahizələri dinlənilmişdir.
Bölmənin digər xəbərləri
