İLHAM TOFİQ OĞLU MƏMMƏDOV
İlham Məmmədov 1955-ci il iyulun 1-də Bakı şəhərində anadan olmuşdur. 1970-ci ildə orta məktəbi qızıl medalla bitirən İlham Məmmədov Azərbaycan Dövlət Neft və Kimya İnstitutunun tətbiqi riyaziyyat fakültəsinə daxil olmuş, 1975-ci ildə ali təhsilini fərqlənmə diplomu ilə başa vurmuşdur. O, əmək fəaliyyətinə elə həmin institutda assistent kimi başlamış, sonra isə orada böyük elmi işçi vəzifəsində çalışmışdır.
1982-ci ildən İlham Məmmədov həyatını Azərbaycan Elmlər Akademiyasının Riyaziyyat və Mexanika İnstitutu ilə bağlamışdır. İnstitutda baş elmi işçi kimi fəaliyyətə başlayan İlham Məmmədov qısa müddət ərzində İnstitutun direktor müavini və direktoru vəzifəsinə qədər yüksələ bilmişdir.
İlham Məmmədov 1976-cı ildə namizədlik, 1981-ci ildə doktorluq dissertasiyalarını müvəffəqiyyətlə müdafiə etmiş, 1988-ci ildə professor elmi adını almış, 2001-ci ildə isə Azərbaycan Milli Elmlər Akademiyasının müxbir üzvü seçilmişdir.
İlham Məmmədov tətbiqi riyaziyyat sahəsində səmərəli elmi fəaliyyət göstərən tanınmış alimlərdən idi. Onun xüsusi törəməli diferensial tənliklərin keyfiyyət nəzəriyyəsi ilə bağlı araşdırmalarının nəticələri mütəxəssislər tərəfindən həmişə yüksək qiymətləndirilmişdir. Alimin mötəbər elmi nəşrlərdə işıq üzü görmüş əsərləri, habelə müxtəlif beynəlxalq simpozium və konfranslarda etdiyi elmi məruzələr ölkəmizdə riyaziyyat elminin inkişafına dəyərli töhfə olmuşdur.
İlham Məmmədov elmi yaradıcılıqla yanaşı, bacarıqlı elm təşkilatçısı kimi də səmərəli fəaliyyət göstərmişdir. O, İnstitut direktoru, Azərbaycan Respublikasının Prezidenti yanında Ali Attestasiya Komissiyası Rəyasət heyətinin üzvü olaraq ölkəmizdə riyaziyyatçı kadrların hazırlanması sahəsində xidmətlər göstərmişdir. İlham Məmmədov NATO-nun elm komitəsinin eksperti kimi Azərbaycanı bu nüfuzlu beynəlxalq qurumda ləyaqətlə təmsil etmişdir.
İlham Məmmədov yüksək ixtisaslı elmi kadrlar hazırlanmasında qüvvə və bacarığını əsirgəməmişdir. Onun rəhbərliyi ilə çox sayda elmlər namizədi və doktoru hazırlanmışdır.
Tanınmış alim, bacarıqlı elm təşkilatçısı və gözəl insan İlham Məmmədovun əziz xatirəsi onu tanıyanların qəlbində həmişə yaşayacaqdır.
Allah rəhmət eləsin!
İlham Əliyev, Heydər Əliyev,
Murtuz Ələsgərov, Artur Rasizadə,
Ramiz Mehdiyev, Elçin Əfəndiyev,
Fatma Abdullazadə, Mahmud Kərimov,
Misir Mərdanov, Arif Mehdiyev,
Nəriman Quliyev, Toğrul Şahtaxtinski,
Azad Mirzəcanzadə, Siyavuş Qarayev,
Akif Hacıyev, Telman Əliyev,
Bala İsgəndərov
Bölmənin digər xəbərləri
