İlin ilk 2 ayında Türkiyə Azərbaycandan 1,1 milyard kubmetr təbii qaz idxal edib
Bakı, 3 may, Nihad Budaqov, AZƏRTAC
Cari ilin fevralında Türkiyə Azərbaycandan 536,61 milyon kubmetr təbii qaz idxal edib.
AZƏRTAC xəbər verir ki, bu barədə Türkiyənin Enerji Bazarını Tənzimləmə Təşkilatı (EPDK) məlumat yayıb. Fevralda Azərbaycandan qaz idxalının Türkiyənin ümumi idxalındakı payı isə 9,93 faiz olub. 2017-ci ilin fevral ayında Türkiyə Azərbaycandan 506,14 milyon kubmetr təbii qaz idxal etmişdi.
Bu ilin yanvarında isə Türkiyə Azərbaycandan 594,15 milyon kubmetr təbii qaz idxal edib. Beləliklə, ilin ilk 2 ayında Azərbaycandan Türkiyəyə 1 milyard 130,7 milyon kubmetr qaz ixrac olunub.
Qeyd edək ki, Türkiyə Azərbaycandan təbii qazı Cənubi Qafqaz Boru Kəməri (CQBK) (Bakı-Tbilisi-Ərzurum) ilə idxal edir. 2006-cı ilin sonlarında istismara verilən bu boru kəməri hazırda Azərbaycan, Gürcüstan və Türkiyəyə “Şahdəniz” qazını çatdırır. 2017-ci il ərzində CQBK-nın gündəlik orta ötürücülük gücü təqribən 20,5 milyon kubmetr qaz olub. Kəmərin iki operatoru var - BP şirkəti CQBK obyektlərinin tikintisi və istismarı üzrə məsul texniki operatoru, SOCAR isə CQBK-nın biznes icrası üzrə məsul kommersiya operatorudur.
Cənubi Qafqaz Boru Kəməri şirkətinin sərmayədarları belədir: BP (operator - 28,8 faiz), “AzŞD” (10 faiz), “Cənub Qaz Dəhlizi Midstrim” (6,7 faiz), “Petronas” (15,5 faiz), “LUKoil” (10 faiz), “NICO” (10 faiz), və “TPAO” (19 faiz).
Bölmənin digər xəbərləri
