İngiltərənin şimal-qərbində quraqlıq elan edilib
London, 30 may, AZƏRTAC
Böyük Britaniya 1910-cu ildən bəri ən günəşli yaz fəslini yaşayıb.
AZƏRTAC “Reuters” agentliyinə istinadla xəbər verir ki, martın 1-dən mayın 27-dək Böyük Britaniyada 630 saat günəşli hava qeydə alınıb. Bu göstərici ötən ilin eyni dövründəki 377 saatla müqayisədə əhəmiyyətli dərəcədə artım deməkdir.
Uzunmüddətli quraqlıq səbəbindən çaylar və su anbarlarındakı suyun səviyyəsi 60 faizdən aşağı düşüb. Bu səbəblə İngiltərənin şimal-qərb bölgəsində rəsmi olaraq quraqlıq elan edilib. Son günlərdə qeydə alınan yağışlara baxmayaraq, həm şimal-qərb, həm də şimal-şərq bölgələri 1929-cu ildən bəri ilin əvvəlinə ən quraq startı verib. Ümumilikdə isə İngiltərə 1956-cı ildən bəri ən quraq fevral-aprel dövrünü yaşayıb.
Qeyd edək ki, bu quraqlıqdan əvvəl ölkə 2023-cü ilin oktyabrı ilə 2024-cü ilin sentyabrı arasında tarixindəki ən yağışlı 12 ayı yaşayıb və bu da genişmiqyaslı daşqınlara səbəb olub.
Hazırda isə su tələbatının 2030-cu illərin ortalarına qədər mövcud təchizat imkanlarını üstələyə biləcəyi ilə bağlı narahatlıqlar fonunda, ətraf mühit naziri Stiv Rid hökumətin inşa olunacaq iki böyük su anbarı layihəsinə birbaşa nəzarəti üzərinə götürüb.
Bölmənin digər xəbərləri
