İradə Hüseynova: Şəhidlərin həyat və döyüş yolunun gənc nəslə çatdırılması böyük əhəmiyyət daşıyır
Bakı, 25 sentyabr, AZƏRTAC
Elm və Təhsil Nazirliyinin Molekulyar Biologiya İnstitutunda 27 Sentyabr - Anım Gününə həsr olunmuş tədbir keçirilib.
İnstitutdan AZƏRTAC-a bildirilib ki, tədbirdən əvvəl institutun direktoru vəzifəsini icra edən, akademik İradə Hüseynovanın rəhbərliyi ilə kollektiv İkinci Şəhidlər xiyabanını ziyarət edib. Vətən müharibəsində Azərbaycanın ərazi bütövlüyü uğrunda canlarından keçmiş şəhidlərin xatirəsi ehtiramla yad olunub, məzarları üzərinə gül dəstələri düzülüb.
Tədbir Azərbaycan Respublikasının Dövlət Himninin səsləndirilməsi ilə başlanıb. Vətən müharibəsi şəhidlərinin xatirəsi bir dəqiqəlik sükutla yad edilib, Anım Gününə həsr olunmuş film nümayiş etdirilib.
Mərasimdə akademik İradə Hüseynova çıxış edərək 27 Sentyabr - Anım Gününün tarixi əhəmiyyətindən, 2020-ci ildə başlayan Vətən müharibəsində Azərbaycan Ordusunun göstərdiyi qəhrəmanlıqdan və şəhidlərin fədakarlığından danışıb. Akademik qeyd edib ki, 27 Sentyabr xalqımızın yaddaşında həm Vətən müharibəsində canından keçmiş şəhidlərin xatirəsinin ehtiramla yad edildiyi, həm də Azərbaycanın Zəfərə aparan yolunun başlanğıcı kimi xüsusi yer tutur. Bildirib ki, Prezident İlham Əliyevin 2020-ci il 2 dekabr tarixli Sərəncamına əsasən, Vətən müharibəsində qəhrəmancasına döyüşmüş hərbi qulluqçuların və bütün şəhidlərin xatirəsinə ehtiram əlaməti olaraq hər il sentyabrın 27-si ölkəmizdə Anım Günü kimi qeyd olunur.
İradə Hüseynova 44 gün davam edən Vətən müharibəsinin Azərbaycan xalqının birlik və həmrəyliyini, dövlətin və ordunun gücünü nümayiş etdirdiyini vurğulayıb. O, Azərbaycanın ərazi bütövlüyünün bərpası istiqamətində əldə olunan nəticələrdə şəhidlərin qəhrəmanlıq və fədakarlığının xüsusi yer tutduğunu bildirib.
Akademik, həmçinin 2020-ci il noyabrın 10-da imzalanmış üçtərəfli Bəyanata uyğun olaraq Ağdam, Kəlbəcər və Laçın rayonlarının Azərbaycana qaytarıldığını diqqətə çatdırıb.
Çıxışında işğaldan azad edilmiş ərazilərdə həyata keçirilən bərpa və quruculuq işlərinə, şəhid ailələri və qazilərə göstərilən dövlət qayğısına toxunan İradə Hüseynova şəhidlərin həyat və döyüş yolunun gənc nəslə çatdırılmasının mühüm əhəmiyyət daşıdığını qeyd edib.
Tədbirdə AMEA-nın müxbir üzvü Novruz Quliyev, professor Könül Baxşəliyeva, şəhid qardaşı Fəzail Məmmədov və kadrlar üzrə mütəxəssis Mehriban Əhmədova çıxış ediblər. Çıxışlarda Anım Gününün Azərbaycanın müasir dövlətçilik tarixindəki əhəmiyyətindən, Vətən müharibəsində şəhid və qazilərin göstərdiyi qəhrəmanlıq və fədakarlıqdan bəhs olunub.
Sonda institutun gənc əməkdaşları Alidə Quluzadə və Elvina Cahangirli şəhidlərin xatirəsinə həsr olunmuş şeirlər səsləndiriblər.
Bölmənin digər xəbərləri
