İRAN BRİTANİYANIN TEHRANDAKI SƏFİRLİYİNİN ATƏŞƏ TUTULMASINI PİSLƏMİŞDİR

15.09.2003 [21:58]
Çap et
A⁺ A^-

AZƏRTAC-ın Tehrandan aldığı xəbərdə deyilir ki, İran İslam Respublikası Xarici İşlər Nazirliyinin rəsmi nümayəndəsi Həmid Rza Asəfi bəyan etmişdir: “Böyük Britaniyanın Tehrandakı səfirliyinin yaşayış kompleksinin bazar günü axşam naməlum şəxslər tərəfindən atəşə tutulması qətiyyən yolverilməz haldır və kəskin surətdə pislənilməyə layiqdir”.

Sentyabrın 15-də Tehranda yayılmış bəyanatda bildirilir ki, İranın xarici siyasət idarəsi bu hadisənin araşdırılmasını diqqətlə izləyir. Bu hadisəni törədən şəxslər tapılacaq və məhkəmə qarşısında cavab verəcəklər.

Britaniyanın Tehrandakı səfirliyinin nümayəndəsi demişdir ki, bazar günü axşam səfirliyin paytaxtın şimalındakı Gülhaqq rayonunda yerləşən yay iqamətgahına iki motosikletçi iki dəfə atəş açmışdır.

Binaya heç bir ziyan dəyməmiş və zərərçəkən olmamışdır.