İran ilə Çin arasında aviareyslər dayandırılıb
Tehran, 1 fevral, AZƏRTAC
Koronavirusun İranda yayılmasının qarşısını almaq məqsədilə ölkənin bütün aviasiya şirkətləri Çinə olan reysləri qeyri-müəyyən vaxta qədər təxirə salıblar.
AZƏRTAC xəbər verir ki, bu barədə qərar hökumətin keçirdiyi fövqəladə toplantıda qəbul edilib. İranın Səhiyyə naziri Səid Nəmaki bildirib ki, reyslərin təxirə salınmasına baxmayaraq İmam Xomeyni beynəlxalq hava limanında müasir avadanlıqlar qurulub və virusa yoluxan adamlar müəyyən olunaraq karantinə aparılır.
Nazir diqqətə çatdırıb ki, Çindən İrana qayıdan ölkə vətəndaşları 14 gün karantində saxlanıldıqdan sonra evlərinə buraxılacaqlar. Bu günə kimi Çindən qayıdan bütün təyyarələrdə dezinfeksiya tədbirləri həyata keçiriləcək.
Yerli mətbuat yazır ki, İran ilə Çinin çox yaxın iqtisadi əlaqələri var. İranda mindən çox iri Çin şirkəti fəaliyyət göstərir. Buna görə də, qarşılıqlı səfərlər intensiv xarakter daşıyır. Odur ki, təyyarə reyslərinin dayandırılması hər iki ölkənin iqtisadiyyatına böyük mənfi təsir göstərəcək.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
