İranın Naxçıvana dron hücumu regional təhlükəsizlik üçün ciddi təhdiddir ŞƏRH
Bakı, 6 mart, AZƏRTAC
İranın Azərbaycanın ayrılmaz hissəsi olan Naxçıvan Muxtar Respublikasının ərazisinə dronlarla hücumu regionda təhlükəsizliyə və sabitliyə ciddi təhdid yaradır. Bu cür addımlar beynəlxalq hüququn norma və prinsiplərinin kobud şəkildə pozulması olmaqla yanaşı, dövlətlərin suverenliyi və ərazi bütövlüyünə qarşı yönəlmiş təhlükəli presedentdir.
Bu fikirləri AZƏRTAC-a açıqlamasında Azərbaycan Milli QHT Forumunun İdarə Heyətinin sədri Ramil İskəndərli bildirib.
O qeyd edib ki, İran tərəfinin bu təxribatı həm hərbi, həm də siyasi və mənəvi baxımdan qəbuledilməzdir. Azərbaycanın dövlət siyasəti hər zaman qonşularla sülh və əməkdaşlıq prinsiplərinə əsaslanıb. Ölkəmiz regionda gərginlik yaratmaq və ya qonşu dövlətlərə qarşı təxribat xarakterli addımlar atmaq yolu tutmayıb. Əksinə, Azərbaycan bütün dövrlərdə humanitar təşəbbüslər, iqtisadi əməkdaşlıq və regional sabitliyə xidmət edən layihələrlə çıxış edib.
Ramil İskəndərli vurğulayıb ki, Naxçıvanda mülki obyektin hədəfə alınması xüsusilə narahatedici faktdır: “Bu hadisə təkcə Azərbaycan dövlətinə qarşı yönəlmiş hərbi təxribat deyil, həm də mülki əhaliyə və mülki infrastruktura qarşı yönəlmiş açıq terror aktı kimi qiymətləndirilməlidir”.
Onun sözlərinə görə, baş verən hadisə ilə bağlı beynəlxalq reaksiyalar da diqqətəlayiqdir. Bu reaksiyalar Azərbaycanın suverenliyinin və ərazi bütövlüyünün dəstəklənməsi ilə yanaşı, regionda strateji balansın qorunmasına yönəlmiş mühüm diplomatik siqnallar kimi qiymətləndirilə bilər.
AMQF sədrinin fikrincə, bu hadisə fonunda Pakistanın nümayiş etdirdiyi mövqe xüsusi əhəmiyyət kəsb edir. “Pakistanın Baş naziri İranın Azərbaycana qarşı hərbi hücumunu və terror aktlarını qətiyyətlə qınayaraq bildirib ki, bu çətin gündə Pakistan dövləti və ordusu Azərbaycan dövləti və ordusunun yanındadır və Azərbaycan hər zaman Pakistana güvənə bilər. Bu bəyanat iki ölkə arasında mövcud olan sarsılmaz dostluq və qardaşlıq münasibətlərinin növbəti dəfə təsdiqi oldu”, – deyə Ramil İskəndərli qeyd edib.
O bildirib ki, Azərbaycan və Pakistan münasibətləri uzun illərdir strateji tərəfdaşlıq səviyyəsində inkişaf edir. Bu münasibətlərin simvolik göstəricilərindən biri Pakistanın ən yüksək səviyyədə Azərbaycanın yanında olduğunu nümayiş etdirməsidir. Pakistanın Baş naziri və yüksəkrütbəli hərbi rəhbərliyinin Bakıda keçirilən hərbi paradlarda iştirakı Azərbaycanla hərbi-siyasi həmrəyliyin açıq ifadəsi kimi qiymətləndirilir.
“Pakistanın nüvə dövləti olması fonunda onun Azərbaycana verdiyi siyasi dəstək ayrıca strateji əhəmiyyət daşıyır. Bu faktor regionda balansın qorunması baxımından mühüm mesajdır. Pakistanın Azərbaycanın suverenliyini və təhlükəsizliyini müdafiə edən açıq mövqeyi göstərir ki, beynəlxalq səviyyədə Azərbaycanın yanında dayanan güclü tərəfdaşlar mövcuddur”, – deyə AMQF sədri əlavə edib.
O vurğulayıb ki, Azərbaycanın sərt və prinsipial mövqeyi də öz nəticəsini verib. Rəsmi Bakının qəti reaksiyası İranı geri çəkilməyə və eskalasiyanın qarşısını almağa məcbur edən mühüm amillərdən biri oldu.
Bölmənin digər xəbərləri
