İşğalçı Ermənistanın əməlləri beynəlxalq hüquq normalarının pozulmasından ibarətdir
Bakı, 17 oktyabr, AZƏRTAC
Prezident İlham Əliyev son günlərdə Türkiyənin “Haber Global”, “Haber Türk”, NTV televiziya kanallarına, eyni zamanda, Rusiyanın Ria Novosti agentliyi üçün “Rossiya Seqodnya Beynəlxalq İnformasiya Agentliyi” media qrupunun baş direktoru Dmitri Kiselyova müsahibəsində işğalçı Ermənistanın beynəlxalq hüququn norma və prinsiplərini kobud şəkildə pozmasını, humanitar atəşkəsdən yararlanaraq Azərbaycana yeni hücumlar təşkil etdiyini əsaslı şəkildə diqqətə çatdıraraq dünyanı işğalçının faşist, antiinsani, təcavüzkar siyasətinə müşahidəçi qalmamağa çağırıb. Reallıq budur ki, Ermənistan Rusiyanın vasitəçiliyi ilə Moskvada Azərbaycan və Ermənistanın Xarici İşlər nazirlərinin keçirilmiş görüşünün yekunu olaraq razılaşdırılmış humanitar atəşkəs rejiminin tələblərini pozaraq dinc əhalini bilərəkdən hədəfə alır, uzun illərdən bəri havadarlarının dəstəyi ilə azərbaycanlılara və türklərə qarşı törətdiyi soyqırımı aktlarına sadiqliyini təsdiqləyir. Əhalinin sıx yaşadığı və təmas xəttindən xeyli aralıda yerləşən Gəncənin, sənaye şəhəri olan Mingəçevirin, bu şəhərdə yerləşən “Azərbaycan” İstilik Elektrik Stansiyasının, Mingəçevir Su Elektrik Stansiyasının Ermənistan ərazisindən “Toçka-U”, “Smerç”, “SCUD” və digər raket sistemlərindən atəşə tutulması humanitar atəşkəsin terrorla əvəzlənməsidir. Bu cinayət əməllərinə dünya birliyinin, ATƏT-in Minsk qrupunun həmsədrlərinin adekvat tədbirlər görməməsi Azərbaycan dövlətinin, xalqının haqlı narazılığına səbəb olur.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.
Rəşadətli Azərbaycan Silahlı Qüvvələrinin 15 gün ərzində Ermənistan hakimiyyətinin “qüdrətli Ermənistan ordusu” barədə illüziyalarını darmadağın etdiyini vurğulayan M.Həsənov deyib: “Silahlı Qüvvələrimiz Cəbrayılda, Ağdamda, Füzulidə, Tərtərdə uğurlu hərbi əməliyyatlar apararaq xeyli sayda yaşayış məntəqələrimizi, strateji əhəmiyyətə malik Hadrutu və bir neçə yüksəkliyi azad edib. Dövlətimizin başçısı İlham Əliyevin oktyabrın 14-də özünün rəsmi “Twitter” səhifəsində qüdrətli Azərbaycan Ordusu tərəfindən Füzuli rayonunun 3, Xocavənd rayonunun 5 kəndinin, oktyabrın 15-də Füzuli rayonunun Arış, Cəbrayıl rayonunun Doşulu, Xocavənd rayonunun Edişə, Düdükçü, Edilli, Çiraquz kəndlərinin işğaldan azad edilməsi xəbərini paylaşması qələbə sevincimizin davamlılığını təsdiq etməklə yanaşı, işğal altında olan bütün torpaqlarımıza Azərbaycan bayrağının sancılacağına əminliyi artırır”.
“Otuz ilə yaxındır ki, qərar və qətnamələrin kağız üzərində qalması, beynəlxalq hüququn pozulması, Azərbaycanın haqq işinə biganəlik xalqımızın və onun qətiyyətli Prezidentinin səbir kasasını doldurdu”, - deyən M.Həsənov qeyd edib ki, Azərbaycan əsgəri öz torpağımızda döyüşür, haqq mübarizəsi aparır, ərazi bütövlüyümüzün təmin olunmasına səy göstərir. Dünya bir daha şahidi olur ki, cinayətkar öz adı ilə çağırılmayanda, cəzasız qalanda danışıqlar masası ətrafinda oturmaqdan yayınır, yeni ərazilər iddiası ilə yeni müharibələrə hazırlaşır, beynəlxalq hüquq normalarına məhəl qoymur. Ermənistanın baş naziri Nikol Paşinyan siyasi savadsızlığını heç bir beynəlxalq hüquq normalarını tanımamaqla bəyan edir. Azərbaycanın Birinci vitse-prezidenti Mehriban Əliyeva rəsmi “Instagram” səhifəsindəki paylaşımında dünya ictimaiyyətini bir daha Ermənistanın müharibə cinayətlərini qınamağa çağırıb.
“Ermənistanın baş nazirindən fərqli olaraq Prezident İlham Əliyev beynəlxalq hüququn norma və prinsiplərini əsas tutaraq qətiyyətli mövqeyi, iradəsi, xalqa güvəni əsasında daim biri-birindən əhəmiyyətli addımları ilə Azərbaycanın dünya birliyində nüfuzunu artırır”, - söyləyən deputat diqqəti Rusiyanın Ria Novosti agentliyi üçün “Rossiya Seqodnya Beynəlxalq İnformasiya Agentliyi” media qrupunun baş direktoru Dmitri Kiselyovun “Siz tarixdə necə qalmaq istərdiniz” sualına dövlətimizin başçısının verdiyi cavaba yönəldib: “Prezident İlham Əliyev bildirdi ki, amalım Azərbaycan xalqının etimadını doğrultmaq, bu vəzifədə olduğum bütün illər ərzində verdiyim vədləri yerinə yetirmək və ölkəni inkişaf yolu ilə aparmaq, onun ərazi bütövlüyünü təmin etməkdir. Rolumun gələcəkdə necə qiymətləndiriləcəyi isə artıq nəyə nail olacağımızdan, Azərbaycan xalqının iradəsindən asılı olaraq müəyyən ediləcək. Xalqın fikri bu və ya digər, o cümlədən Dağlıq Qarabağ məsələsi ilə bağlı qərarların qəbul edilməsində həmişə əsas olub”.
M.Həsənov onu da əlavə edib ki, bu gün işğal altında olan torpaqlarımızın azad edilməsi, diplomatik müstəvidə, döyüş meydanında qələbəmiz, Azərbaycanın haqq səsinin daha da ucalması məhz Prezident-xalq birliyinin, dövlətimizin başçısına inamın, etimadın təcəssümüdür. İşğalçı Ermənistan heç bir sahədə Azərbaycanla rəqabət aparmaq gücündə deyil.
Bölmənin digər xəbərləri
