İslam Əməkdaşlıq Təşkilatının baş katibi Xocalı soyqırımı qurbanlarının xatirəsini yad etmişdir
Bakı, 26 fevral (AZƏRTAC). İslam Əməkdaşlıq Təşkilatının (İƏT) baş katibi İyad bin Amin Mədəni 1992-ci il fevralın 25-dən 26-na keçən gecə Ermənistan silahlı qüvvələri tərəfindən Xocalıda törədilmiş qətliam nəticəsində həyatını itirmiş günahsız insanların xatirəsini yad etmişdir.
Xarici İşlər Nazirliyinin mətbuat xidmətindən AZƏRTAC-a bildirmişlər ki, baş katib Ermənistan tərəfindən Azərbaycan ərazilərinin işğalının Xocalı soyqırımının törədilməsinə zəmin yaratdığını qeyd etmişdir. O xatırlatmışdır ki, 2013-cü ildə İƏT Xarici İşlər Nazirləri Şurasının Qvineyanın paytaxtı Konakri şəhərində keçirilmiş 40-cı iclasında qəbul edilmiş qətnamədə Azərbaycanın işğal olunmuş ərazilərində dinc sakinlərə qarşı törədilmiş qətliam insanlığa qarşı cinayət kimi qiymətləndirilmişdir.
Baş katib Azərbaycan Respublikasının öz torpaqlarının işğalına son qoyulması və ərazi bütövlüyünün bərpası naminə göstərdiyi təşəbbüslərin və səylərin İƏT tərəfindən tam dəstəkləndiyini bir daha bəyan etmişdir.
Həmçinin İyad bin Amin Mədəni Xocalı soyqırımı zamanı həyatını itirmiş şəxslərin yaxınlarına dərin hüznlə başsağlığı vermişdir.
Bölmənin digər xəbərləri
