REGİONLAR
İSMAYILLIDA ÜZÜM İSTEHSALI KEÇƏN İLƏ NİSBƏTƏN İKİ DƏFƏ ARTMIŞDIR
Regionların sosial-iqtisadi inkişafı Dövlət Proqramının uğurla həyata keçirildiyi İsmayıllı rayonunda üzümçülük sürətlə inkişaf etdirilir.
Rayon icra hakimiyyətinin aqrar şöbəsindən bu barədə AZƏRTAC-a verilən məlumatda göstərilir ki, hazırda plantasiyaların sahəsi 703 hektara çatdırılmışdır. Bağların 296 hektarı üzümçülük sahəsində böyük ənənələri olan İvanovka kəndi ərazisindədir. “Monolit” şirkəti Mollaisaqlı və Hacıhətəmli kəndləri ərazilərində geniş plantasiyalar salmışdır. Bu ərazilərdə indi şirkətin 254 hektar üzüm bağı vardır. Hazırda daha 20 hektarda plantaj şum qaldırılmışdır. Həmin sahədə yeni üzümlüklər salınacaqdır.
Rayon üzrə plantasiyaların 491 hektarı məhsuldardır. Təkcə carı mövsümdə bağlardan 2.902 ton məhsul yığılmışdır. Bu, keçən ildəkindən 1.002 ton çoxdur. Ötən ilədək məhsul rayonda fəaliyyət köstərən Kürdmaşı üzüm emalı zavodu tərəfindən qəbul olunurdu. Bu ildən Hacıhətəmlidəki emal müəssisəsi də bərpa edilmişdir. Artıq həmin müəssisə də üzüm qəbuluna başlamışdır.
Üzümçülüyün inkişafı əhalinin məşğulluğuna geniş imkanlar açmışdır. İlboyu qayğı tələb edən bağlarda hazırda minlərlə yerli sakin çalışır. Emal müəssisələrində işləyənlərin sayı isə 100 nəfərədəkdir.
Rayonda üzümçülüklə məşğul olan sahibkarlara hər cürə yardım edilir. Bu, yaxın gələcəkdə üzümçülüyün iqtisadiyyatın aparıcı sahəsinə çevrilməsindən xəbər verir.