İspaniyada yenidən dəmir yolu qəzası baş verib, ölən və xəsarət alanlar var
Stokholm, 21 yanvar, Nərgiz Cəfərli, AZƏRTAC
İspaniyada yeni dəmir yolu qəzası baş verib.
AZƏRTAC xəbər verir ki, axşam saatlarında Barselona yaxınlığında sərnişin qatarı uçmuş dayaq divarı ilə toqquşduqdan sonra relsdən çıxıb. Qəza nəticəsində qatarın maşinisti həlak olub, daha 15 nəfər müxtəlif dərəcəli xəsarətlər alıb. Yaralılardan dördünün vəziyyətinin ağır olduğu bildirilir.
İlkin məlumatlara görə, qəzaya son günlər yağan güclü yağışlar nəticəsində dəmir yolu xəttinin kənarında yerləşən dayaq divarının uçması səbəb olub. Hadisə Kataloniyanın Sant-Sadurni d’Anoia və Gelida stansiyaları arasında qeydə alınıb.
Qəza cəmi iki gün əvvəl İspaniyada baş vermiş digər irimiqyaslı dəmir yolu faciəsindən sonra yaşanıb. Həmin hadisə zamanı iki yüksəksürətli qatarın relsdən çıxması nəticəsində 42 nəfər həlak olmuş, 120 nəfər isə xəsarət almışdı. Bu hadisələr ölkədə dəmir yolu infrastrukturunun vəziyyəti ilə bağlı narahatlıqları daha da artırıb.
Bölmənin digər xəbərləri
