İSRAİL SƏFİRİ GORANBOY RAYONUNDA VƏ GƏNCƏDƏ OLMUŞDUR
AZƏRTAC xəbər verir ki, İsrailin Azərbaycandakı səfiri Artur Lenk bölgələrlə tanışlıq məqsədi ilə Goranboy rayonunda olmuşdur.
İsrail diplomatı ümummilli lider Heydər Əliyevin rayon mərkəzində ucaldılmış abidəsini ziyarət etmiş, ulu öndərin adını daşıyan muzeydə, tarix və diyarşünaslıq muzeyində olmuşdur.
Sonra səfir Artur Lenk rayon rəhbərliyinin və Milli Məclisin deputatı Gültəkin Hacıyevanın müşayiəti ilə cəbhə xəttində yerləşən Tap Qaraqoyunlu kəndinə gəlmişdir. O, torpaqlarımızın bütövlüyü uğrunda canlarından keçmiş qəhrəmanların xatirəsinə ucaldılmış abidə kompleksi önünə gül qoymuşdur.
Kənd sakinləri ilə söhbət edən diplomat İsrailin Azərbaycanın ərazi bütövlüyünü tanıdığını və münaqişənin həllində hər zaman ölkəmizi dəstəklədiyini bildirmişdir. O, düşmənlə üz-üzə dayanan insanları qəhrəman adlandırmışdır.
Rayon İcra Hakimiyyətində fermer təsərrüfatlarının rəhbərləri ilə keçirilən görüşdə səfir İsrailin kənd təsərrüfatı sahəsində uğurlarından danışmış və dost ölkənin qabaqcıl iş təcrübəsi ilə bağlı fikir mübadiləsi aparılmışdır.
Aprelin 25-də Gəncəyə gələn səfir Artur Lenk şəhər icra hakimiyyətində görüşdən sonra Gəncədəki yəhudi icmasının üzvləri ilə söhbət etmişdir.
Bölmənin digər xəbərləri
