İSRAİL SON DÖRD İLDƏ BMT-NİN 13 ƏMƏKDAŞINI HƏBS ETMİŞDİR
BMT-nin baş katibi Kofi Annan isə Yaxın Şərqə ekspertlər göndərmək qərarına gəlmişdir. Onlar fələstinli yaraqlıların BMT-nin Yardım və İşədüzəltmə Agentliyinə (UNRWA) məxsus “təcili yardım” maşını ilə Qəzzəyə əldəqayırma raketlər daşıması barədə israillilərin bəyanatlarını araşdıracaqlar.
Agentliyin ünvanına deyilən ittihamlarla yanaşı, videoyazılar da nümayiş etdirilmişdir. Videoyazılarda raketlərin BMT-yə məxsus maşına yüklənməsi əks olunmuşdur. Agentlikdə İsrail tərəfinin bu iddiasının yoxlanıldığını, lakin “bunun həqiqətə uyğun olmadığını” bildirmişlər. Beynəlxalq təşkilatda açıqlamışlar ki, maşına adi tibb xərəkləri yüklənirmiş.
Agentliyin başçısı Piter Hansen İsrailin Baş naziri Ariel Şarona məktub göndərərək, onun hökumətini BMT əməkdaşlarının həyatını təhlükə qarşısında qoyan “bədnam təbliğat” aparmaqda təqsirləndirmişdir. O, İsrail hökumətindən dərhal və açıq surətdə üzr istəməsini tələb etmişdir. P.Hansen xüsusi bəyanatında vurğulamışdır ki, İsrail hökuməti artıq bir neçə dəfə “Agentlik barədə yalan məlumatlar” yayır.
P.Hansen Kanadanın SBS yayım korporasiyasına müsahibəsində etiraf etmişdir ki, onun Agentliyində çalışan 24 min fələstinlidən bəziləri, bəlkə də, hərbiləşdirilmiş Həmas təşkilatının üzvləridir. O demişdir: “Mən bunu cinayət hesab etmirəm. Biz onlardan siyasi imtahan götürmürük və insanları əqidələrinə görə işdən çıxarmırıq”.
Bölmənin digər xəbərləri
