İsrailin Livanla sərhəddəki şəhərlərinin bərpasına icazə verilib
Bakı, 30 noyabr, AZƏRTAC
İsrail ordusunun (SAXAL) şimal komandanlığı yerli hakimiyyət orqanlarına Livanla sərhəddə yerləşən yaşayış məntəqələrində bərpa işlərinə başlamağa icazə verib.
AZƏRTAC xəbər verir ki, “The Times of Israel” qəzetinin məlumatına əsasən, SAXAL-ın şimal komandanlığının rəhbəri general-mayor Ori Qordin sərhəddə müdafiənin gücləndirildiyini və yeni zastavaların yaradıldığını bildirib.
Qeyd edək ki, Livanla sərhəddə gedən döyüşlər və bombardmanlar nəticəsində İsrail ərazisində 400-dən çox ev dağıdılıb, 500-ə yaxın ev isə ciddi zədələnib. Eyni zamanda, ölkənin şimalında yaşayan 60 mindən çox israilli evlərini tərk etmək məcburiyyətində qalıb.
Noyabrın 27-də yerli vaxtla saat 04:00-da ABŞ və Fransanın təşəbbüsü ilə Livan və İsrail arasında atəşkəs rejimi qüvvəyə minib. Razılaşmaya görə, “Hizbullah” hərəkatının silahlı dəstələri Litani çayının şimalına çəkilməli, Livan silahlı qüvvələri 60 gün ərzində həmin mövqelərə yerləşməli və İsrail ordusu tədricən Livan ərazisindən çıxmalıdır.
Bölmənin digər xəbərləri
