İSRAİLİN MİLLİ BAYRAMI ŞƏRƏFİNƏ
AZƏRTAC xəbər verir ki, İsrailin Azərbaycandakı səfirliyi ölkəsinin milli bayramı - Müstəqillik günü münasibətilə mayın 8-də “Hyatt Regency-Naxçıvan” mehmanxanasında rəsmi qəbul təşkil etmişdir.
İsrailin Azərbaycandakı səfiri Artur Lenk qəbulda çıxış edərək, ölkəsinin 60 il əvvəl qazandığı müstəqilliyin əhəmiyyətindən danışmışdır. O, ötən müddət ərzində İsrailin böyük inkişaf yolu keçdiyini, regionda nüfuzlu dövlətə çevrildiyini bildirmişdir.
Diplomat İsrail ilə Azərbaycan arasındakı siyasi, iqtisadi, mədəni əlaqələrdən danışmış, ölkəmizdə yəhudi icması üçün yaradılmış şəraitdən məmnunluğunu diqqətə çatdırmışdır.
Milli Məclis sədrinin müavini Valeh Ələsgərov əlamətdar gün münasibətilə İsrail xalqını Azərbaycan Prezidenti İlham Əliyevin adından təbrik etmiş, dövlətimizin başçısının salamlarını və xoş arzularını çatdırmışdır.
Ölkələrimiz arasında münasibətlərin yüksək səviyyəsini xatırladan V.Ələsgərov, Azərbaycanın yəhudi icmasının Azərbaycanın inkişafına töhfələr verdiyini bildirmişdir.
Rəsmi qəbulda Milli Məclisin deputatları, nazirlər, xarici ölkələrin Bakıdakı səfirləri, beynəlxalq təşkilatların təmsilçiləri və digər rəsmi şəxslər, paytaxt ictimaiyyətinin nümayəndələri iştirak etmişlər.
Bölmənin digər xəbərləri
