SİYASƏT
İsrailli analitik: “Azərbaycan əsl sivilizasiyalararası dialoq nümunəsidir”
![İsrailli analitik: “Azərbaycan əsl sivilizasiyalararası dialoq nümunəsidir”](/files/2013/3/1200x630/14071451254800949859_1200x630.jpg)
Bakı, 12 noyabr (AZƏRTAC). “İsrailin səsi” dövlət radiostansiyasında bu ölkənin sakinləri arasında kifayət qədər populyar olan “Günün aktual hadisələri” verilişində III Bakı Beynəlxalq Humanitar Forumunun yekunları geniş şərh edilmişdir.
AZƏRTAC xəbər verir ki, “İsrailin səsi” radiostansiyasının daimi şərhçisi, beynəlxalq münasibətlər sahəsində ekspert, “İsrail-Azərbaycan” Beynəlxalq Assosiasiyasının (Azİz) idarə heyətinin üzvü Arye Qut verilişin aparıcısının suallarına cavab verərək qeyd etmişdir ki, çox mühüm beynəlxalq tədbir olan Bakı Humanitar Forumu beynəlxalq intellektual birliyin, siyasətçilərin, alimlərin, mədəniyyət xadimlərinin, nəzəriyyəçilərin, vətəndaş cəmiyyətinin nümayəndələrinin görüşüb müzakirələr apardığı həqiqi və real məkandır.
Arye Qut demişdir: “Bu gün dünyada praktiki olaraq ikinci elə bir intellektual məkan yoxdur ki, dünyanın 70 ölkəsinin siyasi, elmi, intellektual və biznes elitasının nümayəndələri orada görüşərək, bütün dünya birliyi üçün maraq doğuran iqtisadi inkişafın humanitar aspektləri, multikulturalizm və bənzərsizlik, postmodern dövründə milli identiklik, davamlı inkişaf və ekoloji sivilizasiya, informasiya məkanının qloballaşması şəraitində medianın aktual məsələləri kimi problemləri müzakirə etsinlər. Bu forumda İsrail dövlətinin yetərincə təmsil olunduğunu görmək çox xoş idi. İsraili üç Nobel mükafatı laureatı professor Dani Şextman, professor Ada Yonat və professor Arye Varşel təmsil edirdi. Onların hər biri III Bakı Beynəlxalq Humanitar Forumunun yüksək səviyyədə təşkil edilməsi, azərbaycanlıların səmimiyyəti və qonaqpərvərliyi barədə təəssüratlarını mənimlə bölüşdülər”.
Arye Qutun öz məruzəsinin hansı məsələyə həsr edildiyini soruşan aparıcıya forumda “Multikulturalizm və özgünlük” mövzusunda “dəyirmi masa” iclasında çıxış etdiyini bildirərək demişdir: “Mən İsrail vətəndaşı və İsraildə Azərbaycan diasporunun nümayəndəsi kimi qeyd etdim ki, Azərbaycan rəhbərliyi ölkənin yəhudi icmasının ənənələrinə qayğı və diqqətlə yanaşır. Bütün dünyada yəhudilərin yığcam şəkildə yaşadığı yeganə və unikal bir yer olan Qırmızı qəsəbə həqiqətən Azərbaycanın fəxridir. Burada yəhudilərlə azərbaycanlılar əsrlər boyu mehriban yaşayır, bir-birini doğma qardaş hesab edirlər. Bu insanlar ümumi tale ilə bağlıdır. Təsadüfi deyildir ki, 1918-1919-cu illərin faciəli hadisələri zamanı erməni daşnaklar Azərbaycan şəhərlərində qanlı qırğın törədərkən azərbaycanlılarla bərabər üç mindən çox yəhudi də həlak olmuşdur”.
Ekspertin sözlərinə görə, Müqəddəs Torpaqda İsrail dövlətində Azərbaycanın əsl diaspor təşkilatı olan Beynəlxalq “İsrail-Azərbaycan” Assosiasiyasının yaradılması Azərbaycanın dözümlülük və tolerantlıq siyasətinin nəticəsidir.
Arye Qut demişdir: “Bu diaspor təşkilatını məhz əslən Azərbaycandan olan yəhudilər tərəfindən yaradılması tarixi faktdır. Bu gün reallıq belədir və bir qədər qeyri-təvazökarlıq kimi görünsə də, deməliyəm ki, Azərbaycan bununla fəxr edə bilər, İsraildə Azərbaycanın yetərincə güclü diaspor təşkilatı - Beynəlxalq “İsrail-Azərbaycan” Assosiasiyası fəaliyyət göstərir. Azərbaycanın birinci xanımı, Milli Məclisin deputatı, UNESCO və İSESCO-nun xoşməramlı səfiri Mehriban xanım Əliyevanın rəhbərlik etdiyi Heydər Əliyev Fondu bu assosiasiyanın strateji tərəfdaşıdır”,
A.Qutun sözlərinə görə, İsrail müasir Azərbaycandakı 20 minlik yəhudi icmasına səmimi münasibətdə ölkə rəhbərliyinin rolunu yüksək qiymətləndirir.
“İsrail-Azərbaycan” Beynəlxalq Assosiasiyasının (Azİz) idarə heyətinin üzvü demişdir: Gəlin unutmayaq ki, Azərbaycan ərazisinin 20 faizi Ermənistan tərəfindən işğal edilmişdir, ölkə sakinlərinin orta hesabla hər 7 nəfərindən biri qaçqındır. Azərbaycanda heç vaxt antisemitizm olmamışdır və biz əslən Azərbaycandan olanlar, İsraildə Azərbaycan diasporunun nümayəndələri bununla fəxr edirik. Azərbaycan əsl sivilizasiyalararası dialoq nümunəsidir. Siz mənə ikinci bir istər müsəlman yaxud xristian ölkəsi göstərin ki, orada Prezidentin və ölkənin birinci xanımının himayəsi ilə iki sinaqoq və Cənubi Qafqazda ən böyük yəhudi təhsil mərkəzi tikilmiş olsun. Mənim fikrimcə, siz sadəcə olaraq ikinci belə bir ölkə tapa bilməzsiniz”.
Arye Qut “İsrailin səsi” dövlət radiostansiyasında öz şərhini yekunlaşdıraraq demişdir: “İnkaredilməz faktdır ki, Azərbaycan dünyanın intellektual və siyasi elitası, o cümlədən məşhur dövlət xadimləri, elmin müxtəlif sahələri üzrə Nobel mükafatları laureatları, gələcəyin qlobal sivilizasiyalarına yol tapmağa çalışan, planetimizin rəngarəng mədəni palitrasını qoruyub saxlamağa qabil olan nüfuzlu beynəlxalq təşkilatların rəhbərləri üçün beynəlxalq müzakirələr məkanına çevrilməkdədir”.