DÜNYA
İSTANBULDA İKİ SİNAQOQU PARTLADAN TERRORÇULARDAN İKİSİNİN ŞƏXSİYYƏTİ MƏLUMDUR
“Bet-İsrael” sinaqoqunun yaxınlığına partlayıcı maddə gətirən yük maşınını Məsut Çabuk idarə etmişdir. O, Türkiyə DİN-də “İslam hərəkatı” terror təşkilatının üzvü kimi tanınır. Həmçinin bildirilir ki, Çabuk Türkiyə ilə həmsərhəd ölkələrdən birində terror hazırlığı keçmişdir.
DİN-in terrorizmlə mübarizə şöbəsi əməkdaşlarının ehtimalına görə, ikinci yük maşınının sürücüsü “Böyük İslam Şərqi Cəbhəsinin döyüşçüləri” ekstremist təşkilatının üzvü Azad Əkinci ola bilərdi. Hər iki təşkilat Üsamə ben Ladenin “Əl-Qaidə” təşkilatı ilə əlaqə saxlayır.
“XəbərTürk” agentliyinin məlumatına görə, polis İstanbulda törədilən terror aktlarında iştirakda şübhəli bilinən 30 adam tutmuşdur.
Təhqiqat zamanı bəzi şübhəli şəxslərin bədənlərinin DNT üzrə testləri də aparılır. Baş nazir Rəcəb Tayyib Ərdoğan bildirmişdir ki, bu testlər cinayətlərin təşkilatçılarının izinə düşməyə kömək edəcəkdir. O, bütün ölkələri terrorizmə qarşı birlikdə, beynəlxalq səviyyədə mübarizə aparmağa çağırmışdır.