İstanbulda soyqırımı və deportasiya qurbanlarına həsr olunmuş beynəlxalq konfrans təşkil edilib
Bakı, 30 iyun, AZƏRTAC
Sosial Strateji Tədqiqatlar və Analitik Araşdırmalar İctimai Birliyi tərəfindən Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilən "Soyqırımı və deportasiya qurbanlarına dəstək" layihəsinin icrası uğurla davam etdirilir.
İctimai Birlikdən AZƏRTAC-a bildirilib ki, layihənin icrasında Türkiyədə fəaliyyət göstərən Bolqarıstan Türkləri Mədəniyyət və Xidmət Dərnəyi (BULTÜRK) və Özbəkistanın Yüksək Səlahiyyət Təşkilatı tərəfdaş qismində iştirak edir.
Layihə çərçivəsində İstanbulda, Mehmet Akif Ersoy Kültür və Sənət Mərkəzində “Deportasiya qurbanlarının qayıdış imkanlarının reallaşdırılması istiqamətində beynəlxalq platforma” adlı konfrans keçirilib.
Tədbir Azərbaycanın və Türkiyənin dövlət himnlərinin səsləndirilməsi ilə başlayıb.
Sonra İstanbul Bayrampaşa Bələdiyyəsi sədrinin vəkili İbrahim Akın, Bayrampaşa icra nümayəndəsi Abdullah Çiftçi və MHP Bayrampaşa vilayət başçısı köməkçisi Derin Bozoklu Abay çıxış edərək Azərbaycan-Türkiyə münasibətlərini dünyaya nümunə olan qardaşlıq modeli kimi dəyərləndiriblər.
Daha sonra BULTÜRK Dərnəyinin başqanı Rafet Ulutürk layihənin məqsədləri barədə məlumat verib. O, konfransın İstanbulda keçirilməsini yüksək qiymətləndirərək təşkilati dəstəyə görə Azərbaycan dövlətinə və layihənin tərəfdaşlarına təşəkkürünü bildirib, əməkdaşlığın strateji əhəmiyyətini vurğulayıb.
Konfransda təşkilatın prezidenti İlqar Hüseynli təqdimatla çıxış edərək Azərbaycanın Türk Dövlətləri Təşkilatında fəal rol oynadığını, türk dövlətləri arasında inteqrasiyanın gücləndirilməsi istiqamətində həyata keçirilən təşəbbüslərin dövlət tərəfindən dəstəkləndiyini bildirib. O, türk xalqlarına qarşı törədilmiş soyqırımı və deportasiya siyasətinin beynəlxalq ictimaiyyətə çatdırılmasının vacibliyini vurğulayıb. Türk Dövlətləri Təşkilatına üzv dövlətlərin QHT Forumunun və Azərbaycan-Türkiyə QHT əməkdaşlıq forumunun bu istiqamətdə mühüm platformalar olduğunu qeyd edib.
Təşkilatın beynəlxalq məsələlər üzrə sədr müavini Fərhad Qəşəmli isə Qərbi Azərbaycandan deportasiya olunmuş azərbaycanlıların taleyindən bəhs edib. O bildirib ki, Qərbi Azərbaycan İcmasının təşəbbüsü ilə beynəlxalq hüquqa əsaslanan “Qərbi Azərbaycana Qayıdış Konsepsiyası” hazırlanıb. Təqdimatda sənədin əsas müddəaları və onun digər türkdilli xalqlar üçün də nümunəvi model ola biləcəyi vurğulanıb.
Konfransda, həmçinin professor Emir Fatih Akbulat “Çərkəz sürgünü və soyqırımı” mövzusunda məruzə ilə çıxış edib. O, əsrlər boyu Rusiya İmperiyası tərəfindən çərkəz xalqına qarşı həyata keçirilmiş zorakılıq və soyqırımı siyasəti barədə tarixi faktları iştirakçıların diqqətinə çatdırıb və bu məsələlərin gündəmdə saxlanılmasına görə Azərbaycan QHT-lərinə təşəkkürünü bildirib.
Konfransın ikinci hissəsində araşdırmaçı alim Cahit Dak Türküstan soyqırımı, Aysu Akbaş Bolqarıstan türklərinin deportasiyası və assimilyasiya siyasəti, Saffet Erdem isə Balkanlarda baş vermiş soyqırımı hadisələri ilə bağlı təqdimatlarla çıxış ediblər.
Müzakirələrdə Türk Dövlətləri Təşkilatına üzv ölkələrin və türkdilli xalqların vahid Soyqırımı Gününün təsis edilməsi ilə bağlı təkliflər səsləndirilib və bu təşəbbüs iştirakçılar tərəfindən müsbət qarşılanıb.
Konfrans sertifikatların təqdim olunması ilə başa çatıb.
Layihə çərçivəsində növbəti tədbir soyqırımı və deportasiyalara məruz qalmış xalqlara həsr olunmuş rəsm və fotosərgisi olub. Sərginin Azərbaycana aid bölməsində Xocalı soyqırımını, həmçinin Qərbi Azərbaycandan deportasiya və soyqırımı faktlarını əks etdirən fotoşəkillər nümayiş etdirilib.
Sərgi iştirakçıları azərbaycanlılara qarşı törədilmiş tarixi ədalətsizlikləri böyük kədər və təəssüf hissi ilə izləyiblər.
Bölmənin digər xəbərləri
