İSTANBULDA TƏHLÜKƏSİZLİK TƏDBİRLƏRİ ARTIRILMIŞDIR
Ankara, İstanbul, İzmir və digər şəhərlərdəki iri ticarət mərkəzlərinin təhlükəsizliyini təmin edən dəstələrin və buradakı polis qüvvələrinin sayı çoxaldılmış, giriş-çıxışlarda yoxlamalar və nəzarət tədbirləri gücləndirilmişdir. Bu tədbirlər xarici ölkələrin səfirlik və konsulluqları, bankları və nümayəndəlikləri ətrafında da görülmüşdür.
İstanbulun Atatürk adına beynəlxalq hava limanında da əlavə təhlükəsizlik tədbirləri həyata keçirilir. Belə ki, əvvəllər, əsasən iş adamlarının istifadə etdiyi “E” çıxış qapısı bağlanmış, burada sərnişinlərin pasport və gömrük yoxlamaları daha diqqətlə aparılmağa başlanmışdır.
Türkiyənin “Haq-İş” həmkarlar ittifaqı isə, ölkəyə turist kimi gələn, lakin burada qanunsuz yolla qalaraq qeyri-leqal işləyən xarici vətəndaşlarla əlaqədar araşdırma aparmışdır. Araşdırmada 3 milyona yaxın türk vətəndaşının iş üçün xarici ölkələrə getdiyi, eyni zamanda, 1980-ci ildən etibarən bir milyona yaxın xarici vətəndaşın Türkiyəyə gəldiyi və əsasən də İstanbulda qanunsuz halda yaşayıb işlədiyi məlum olmuşdur. Bu insanların əksəriyyəti Afrika ölkələrindən gələnlərdir.
Bölmənin digər xəbərləri
