DÜNYA
İSTANBULDA TERROR AKTLARININ TƏŞKİLATÇILARINDAN DAHA BİRİ HƏBS EDİLMİŞDİR
AZƏRTAC-ın müxbiri Ankaradan xəbər verir ki, Türkiyə polisi noyabrın 15-də İstanbulda “Beyt-İsrael” sinaqoqu qarşısında törədilmiş terror aktının təşkilatçılarından daha birini həbs etmişdir. İstanbul Təhlükəsizlik İdarəsi rəisinin müavini Xəlil Yılmaz bildirmişdir ki, polis əməkdaşları terrorçunu Ağrı vilayətindəki “Gürbulaq” nəzarət-buraxılış məntəqəsində yaxalamışlar. O, həmin vaxt Türkiyə-İran ərazisində yerləşən bu məntəqədən ölkə ərazisini tərk etmyə çalışırdı.
Təhqiqat aparan təhlükəsizlik orqanlarının məlumatına görə, saxta sənədlərlə ölkənin hüdudlarından kənarda gizlənməyə cəhd göstərən bu adamın əlamətlərinin təsvir edildiyi fotoşəkil ölkənin bütün polis məntəqələrinə göndərilmişdi.
Noyabrın 29-da bu terrorçu istintaq əməliyyatları aparılmaq üçün İstanbul Dövlət Təhlükəsizliyi Məhkəməsinin prokurorluğuna verilmişdir.