İstedadlı gənclərimiz dövlətimizin inkişafına öz töhfələrini verəcəklər
Bakı, 29 yanvar, AZƏRTAC
Azərbaycan Respublikasının Prezidenti hər zaman gənclərin təşəbbüslərinin dəstəklənməsinə, onların öz potensiallarını reallaşdırması prosesinə böyük önəm verib və bu siyasət uğurla davam etdirilir. Yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən Prezident İlham Əliyevin bu məsələlərə xüsusi yer ayırması bir daha onu göstərir ki, ölkəmizin rəhbəri dövlətimizin idarə olunması, inkişaf etdirilməsi məsuliyyətini və yükünü həm də gənclərlə bölüşür. Bu, xüsusilə yeni texnologiyaların tətbiq edilməsində və effektli idarəetmədə gəncliyə önəm verilməsinin əhəmiyyətini daha da artırır. Bütün sahələrdə gəncliyimizin uğurlu fəaliyyəti üçün geniş və unikal imkanların yaradıldığı bir dövrdə innovasiyaların tətbiqi və realizə edilməsi zərurəti gəncliyin idarəetmədəki payını, yerini və rolunu daha artırmağı diktə edir.
Bu fikirləri AZƏRTAC-a açıqlamasında Azərbaycan Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi, fəlsəfə doktoru İlqar Orucov deyib.
O bildirib ki, Azərbaycanda gənclər müxtəlif dövlət sektorlarında uğurla çalışırlar. Prezidentin nitqindən irəli gələn tezislər onu deməyə əsas verir və bir daha təsdiqləyir ki, istedadlı gənclərin bilik və bacarıqlarından səmərəli istifadənin gerçəkliyi daha da sürətlənəcək, gənclər öz ideyalarını reallaşdırmaqla həm yeni texnologiyaların idarə edilməsini təmin edəcək, həm də yeni texnologiyaların yaradılması imkanına təşviq olunacaqlar.
Prezidentin istedadlı gənclərə önəm verilməsi istiqamətində tapşırıq və tövsiyələri həm də gənclərin enerjisindən istifadə mexanizmlərinin yaradılmasını, gələcəkdə yeni startapların yaradılması, innovasiyaların sənayeyə və iqtisadiyyatın digər sahələrinə tətbiq edilməsi barədə siyasi mövqeyin qətiyyətini şərtləndirir. Artıq Dördüncü Sənaye İnqilabı dövründə dünyada yeni gerçəkliklər və çağırışlar mövcuddur. Bilik iqtisadiyyatı sürətlə inkişaf etməkdədir. Təbii resurslardan səmərəli istifadə və iqtisadiyyatın şaxələndirilməsi, alternativ və qeyri-ənənəvi sahələrin yaranması, yeni texnologiyaların tətbiqi ilə fərqli və tamamilə yeni ixtisasların formalaşması prosesi yeni reallıqları diktə edir. Yüksək texnologiyalar bilikli və bacarıqlı kadr hazırlığını tələb edir. Prezidentin çıxışının mahiyyətində həm də dünyanın yeni gerçəkliklər fonunda ümumi inkişafından geri qalmaması çağırışı dayanırdı: “Bu çağırış həm dövlətin aidiyyəti qurumlarına, həm də bizim gəncliyə idi. Dövlətimizin başçısı bununla istedadlı gənclərin yeni təşəbbüslərinin həyata keçirilməsi üçün bütün imkanların ən qısa zamanda yaradılacağı mesajını verdi”.
Gənclərimiz üçün yaradılacaq əlavə imkanlar dövlətimizin inkişafı prosesində, yeni texnologiyaların idarə edilməsi işində onların potensiallarından tam istifadə etmək üçün münbit şəraiti təmin edəcək. Azərbaycanda neft gəlirləri hesabına insan kapitalının inkişaf etdirilməsi, gənclərimizin ölkəmiz üçün strateji ixtisaslar üzrə təhsil almaqla bağlı reallaşdırılan dövlət qoyuluşlu və məqsədli proqramlar müasir biliklərə yiyələnmiş, milli ruhlu gənc kadr bazamızı artıq formalaşdırıb. Kadr hazırlığı istiqamətində uğurlu işlərimiz onların potensialından post-neft dövründə dayanıqlı inkişafımızı təmin edəcək iqtisadi keçidi təmin etmək üçün vacib addımlardandır. Artıq zaman yetişib ki, biz insan kapitalımızın mövcud resurslarından faydalanaraq həm yeni texnologiyaları tətbiq edək, həm də yeni texnologiyalar yarada bilək. Əminəm ki, istedadlı gənclərimiz dövlətimizin başçısının çağırışına qoşularaq, onlar üçün yaradılan imkanları dəyərləndirərək ölkəmizin yüksək texnologiyalar və innovasiyalar sahəsində dövlətimizin inkişafına öz töhfələrini verəcəklər.
Bölmənin digər xəbərləri
