İsveç alimləri Altsgeymer xəstəliyinin müalicəsinin yeni üsulunu uğurla sınaqdan keçiriblər

17.02.2015 [15:50]
Çap et
A⁺ A^-

Stokholm, 17 fevral, AZƏRTAC

İsveç alimləri Altsgeymer xəstəliyinin müalicəsinin yeni üsulunu uğurla sınaqdan keçiriblər.

İsveçin Karolina Tibb İnstitutunun alimləri yeni müalicə üsulunu bu sindromdan əziyyət çəkən 6 nəfər pasiyentin üzərində sınaqdan keçiriblər.

Yeni metodun mahiyyəti ondan ibarətdir ki, pasiyentlərin beynində seçilmiş sinir hüceyrələri nahiyəsində bu hüceyrələrin dağılmasına mane olan maddə ilə dolu miniatür kapsullar müstəsna dəqiqliklə implantasiya edilir.

Alimlər qeyd edirlər ki, Altsgeymer sindromunun yaranmasına səbəb məhz həmin hüceyrələrin dağılmasıdır. Klinika şəraitində aparılmış sınaqlarda pasiyentlərin beyninin fəallıq göstəriciləri əhəmiyyətli dərəcədə yaxşılaşıb, yaddaş funksiyasının zəifləmə sürəti azalıb.

Lakin layihə rəhbərlərinin fikrincə, bu ağır xəstəliyə qarşı mübarizədə inqilab elmi uğurlar barədə danışmaq hələ tezdir, çünki yeni metod daha geniş miqyasda klinik sınaqlardan keçirilməli və yoxlanılmalıdır.

Rauf Əliyev

AZƏRTAC-ın xüsusi müxbiri

Stokholm