“İsveç demokratları” liderinin toy məclisində cinayətkar təşkilatın nümayəndəsi iştirak edib
Stokholm, 10 oktyabr, Nərgiz Cəfərli, AZƏRTAC
İfrat sağçı və milliyyətçi “İsveç demokratları” partiyasının lideri Yimmi Okessonun toy məclisində “Comanches MC” bayker qruplaşmasının lideri də iştirak edib.
AZƏRTAC xəbər verir ki, “Comanches MC” cinayətkar qruplaşma kimi təsnif edildiyi üçün bu, siyasətçilərin, polisin və ictimaiyyətin tənqidinə səbəb olub.
Malmö polisinin Kəşfiyyat şöbəsinin komissarı Patrik Andersson bildirib ki, bu hadisə həmin toyda “Hells Angels” və ya “Bandidos” kimi qruplaşmaların liderlərinin iştirak etməsinə bənzəyir. Həmin cinayətkar təşkilatlar narkotik alveri ilə məşğul olan dünyanın ən iri cinayətkar sindikatları sırasında yer alır.
“Comanches MC” Niderlandda yaradılmış və İsveç də daxil olmaqla dünyanın müxtəlif ölkələrində filialları olan “Satudarah MC” cinayətkar qrupuna daxildir. 2023-cü ildə yaradılan bu qrup “Satudarah bayker” klubunun keçmiş üzvlərindən ibarətdir. “Onların etdikləri yeganə şey qruplaşmanın adını və jiletlərini dəyişdirmək olub, lakin bu amil dəstənin daha az cinayətkar olması demək deyil. Komançlar cinayət şəbəkəsidir”, -deyə Patrik Andersson deyir.
Yerli mətbuatın məlumatına görə, sözügedən şəxs 2016-cı ildən Okessonun şəxsi tədbirlərində iştirak edir.
Tənqidlərə cavab verən Okesson bildirib ki, qonaq toyda gəlinin yoldaşı kimi iştirak edib. O, “X” platformasında da paylaşım edərək, bu adamla müxtəlif tədbirlərdə dəfələrlə görüşdüyünü, lakin onun kriminal mühitlə əlaqələrindən xəbərsiz olduğunu qeyd edib.
Bayker qruplaşmasının lideri isə bildirib ki, onun Okesson ilə münasibətləri çox səthi və uzaqdan tanışlıq səviyyəsindədir. O əlavə edib: “Bir dəfə onun bağçasında keçirilən şənlikdə iştirak etmişəm. Bu, o qədər keçmişdə olub ki, onu indiki hadisələrlə əlaqələndirmək olmaz. Həmin vaxt klub da yox idi. Ola bilsin ki, üç-dörd dəfə görüşmüşük”.
Liberal Partiyanın lideri Yohan Personun sözlərinə görə, bu, Yimmi Okessonun böyük uğursuzluğudur və siyasətçilərin kriminal mənşəli insanları heç bir vəchlə təşviq etməməsi lazımdır.
Bölmənin digər xəbərləri
