İSVEÇDƏKİ “QARABAĞ” DƏRNƏYİNİN SƏDRİ ABDULLA ƏMİR HAŞİMİNİN ÇIXIŞI
Hörmətli nümayəndələr və qonaqlar!
Əziz həmvətənlər!
İcazə verin, sizləri salamlayım və hörmətli Prezidentimiz cənab İlham Əliyevə, qurultayın təşkilatçılarına, Prezidentin İcra Aparatına, Nazirlər Kabinetinə, Dövlət Komitəsinə öz təşəkkürümü bildirim. Ona görə ki, xarici ölkələrdə yaşayan azərbaycanlıların problem və qayğılarını müzakirə etmək üçün bir daha şərait yaradılmışdır.
Hamımızın bildiyi kimi, 1828-ci ildə Türkmənçay müqaviləsinin imzalanması Azərbaycanı ikiyə parçaladı. Şimali və Cənubi Azərbaycan anlayışı yarandı. Deməli, istər güneyli, istərsə də quzeyli uzun illərdən bəri Vətəndən uzaqlarda məskunlaşmağa məcbur olan mühacir azərbaycanlılar, bir qrup tələbə kimi Azərbaycandan çıxıb təhsili bitdikdən sonra geri qayıtmaqdan imtina ediblər. Digər qrup isə siyasi baxışlarına görə təqibdən yaxa qurtarmaq üçün ölkədən çıxmışlar.
Nəhayət, üçüncü qrup müharibələrdə iştirak etmək ya etməməklə və yaxud iqtisadi çətinliklərlə əlaqədar, həmçinin ailə qurmaq niyyəti ilə ölkəmizi tərk edənlərdən ibarət olmuşlar. Baş verən hadisələr fonunda azərbaycanlıların mühacirəti milli ictimai hadisə səviyyəsinə çevrilərək, müxtəlif səpkili dərnəklər, cəmiyyətlər, birliklər yarandı, mətbuat təsis olundu.
Eyni zamanda, bir çox ölkələrdə məskunlaşmış azərbaycanlılar öz yerlərini tutaraq elmdə, təhsildə, səhiyyədə, mədəniyyətdə, kommersiya strukturlarında çalışdılar. Azərbaycan Respublikasının yenidən müstəqilliyini əldə etməsindən sonra diaspor hərəkatında ciddi canlanma hiss olundu. Mərhum cənab Heydər Əliyevin təşəbbüsü ilə hər il 31 dekabrın Dünya azərbaycanlılarının həmrəyliyi günü kimi keçirilməsi son 15 ildə xaricdəki azərbaycanlıların daha güclü təşkilatlanmasına və lobbiçiliyə tərəf addımlamasına müsbət təsir göstərmişdir.
Bu gün Azərbaycana aid 200-dən artıq dərnək və cəmiyyət, yüzlərlə veb-səhifələr, onlarca elektronik qruplar, bir neçə radio, televiziya və jurnallar mövcuddur ki, soydaşlarımızı biri-birilə əlaqələndirir. Təbii ki, bu əlaqələr dilimizin, adət-ənənələrimizin qorunub saxlanılmasına kömək göstərir. Lakin göründüyü kimi, hələ də çatışmazlıqlar çoxdur. Hər bir xalqın öz vətəni var. Bizim vətənimiz parçalansa da Azərbaycandır. Güneyi də bizimdir, quzeyi də bizimdir. Bizcə diasporumuzun əsas məqsədi bütün dünyada Azərbaycan əsilli vətəndaşlarımızın hüquqlarını müdafiə etmək, eləcə də Azərbaycandan kənarda vətənimizin mənafelərini qorumaqdır. Bu gün təcavüzkar Ermənistan Qarabağımızı işğal altında saxlamağa israrlıdır. Görünür ki, indiyədək gördüyümüz işlər bədnam qonşunu geri oturda bilməmişdir. Deməli, daha artıq güc səfərbər etməliyik, iş görməliyik və yeni metodlar tətbiq etməklə düşməni Qarabağdan çıxarmalıyıq. Təbii ki, diaspor quruculuğu konkret bir dövrlə məhdudlaşmır. Strateji əhəmiyyətə malik olan bu iş daimi fəallıq və uzunmüddətli zəhmət tələb edir. Elə buna görə də bu sahədə qazanılmış nailiyyətləri və qarşıda duran vəzifələri vaxtaşırı müzakirə etmək ehtiyacı yaranır.
Azərbaycançılıq və türkçülük ideyası ilə diaspor fəaliyyətimizi istiqamətləndirib gücləndirə bilərik.
Cənab Prezident, göründüyü kimi, diaspor təşkilatlarının bu gün fəaliyyətləri çox qiymətli olsa da, qənaətbəxş deyildir. Azərbaycanlıların əsasən hansı ölkələrdə yaşaması, onların təşkilatları, media orqanları və fəallıqları barədə təhlil aparmalıyıq və bununla dünya azərbaycanlılarının güclü informasiya şəbəkəsini yaratmalıyıq.
Şübhəsiz ki, hər bir diaspor üçün ən vacib məsələ ana dilinin qorunmasıdır. Bu işdə metodik tövsiyələrin, dərsliklərin çatışmaması səbəbindən ciddi problemlər meydana çıxır. Ümid edirik ki, bu mühüm məsələ həll olunacaq, qurultayda Azərbaycan diasporu və Azərbaycan Respublikası ilə əlaqələr, dünya azərbaycanlılarının həmrəyliyi, həmvətənlərimizin qüvvəsini, diqqətini Azərbaycana yönəltməsi barədə həm nəzəri, həm də əməli təkliflər veriləcəkdir.
Göstərdiyiniz diqqətə görə təşəkkür edirəm.
Bölmənin digər xəbərləri
