İSVEÇRƏ MİSİRDƏN QEYRİ-QANUNİ APARILMIŞ 300-DƏN ARTIQ ƏNTİQ ƏŞYANI QAYTARMIŞDIR

02.12.2003 [18:01]
Çap et
A⁺ A^-

Xarici informasiya agentliklərindən AZƏRTAC-a daxil olmuş məlumatda deyilir ki, İsveçrə hökuməti Misirdən qeyri-qanuni yolla aparılmış, fironlar dövrünə aid 300-dən artıq əntiq əşyanı qaytarmışdır. Bunu Misirin Qədim Mədəniyyət üzrə Ali Şurasının nümayəndələri bildirmişlər.

Qiymətli əşyaları bir neçə ay bundan əvvəl İsveçrə gömrükxanasının əməkdaşları aşkar etmiş, sonra isə Misir ekspertlərinin nümayəndə heyəti Cenevrəyə gəlmişdi. Əşyaların əslliyi sübut edilmiş və tərəflər onların ehramlar ölkəsinə qaytarılması barədə razılığa gəlmişlər. Misir prokurorluğu qeyri-leqal qazıntılar nəticəsində əldə edilmiş qiymətli əşyaların qaçaqmalçılığı yolu ilə varlanmaq qərarına gəlmiş yerli biznesmenə qarşı cinayət işi qaldırmışdır.

Hazırda Misir hökuməti son iki yüzillikdə ölkədən qeyri-qanuni yolla çıxarılmış tarixi irsin axtarılıb tapılması üçün genişmiqyaslı kampaniya aparır. Bu istiqamətdə ən böyük müvəffəqiyyət firon I Ramzesin mumiyasının qaytarılması olmuşdur. Mumiya bu ilin oktyabrında ABŞ-dan Misirə gətirilmişdir.

İSVEÇRƏ MİSİRDƏN QEYRİ-QANUNİ APARILMIŞ 300-DƏN ARTIQ ƏNTİQ ƏŞYANI QAYTARMIŞDIR

MÜƏLLİFLƏ ƏLAQƏ

Bölmənin digər xəbərləri