İtaliya yeni quraqlıq təhlükəsi qarşısında: Venesiya kanalları quruyur
Bakı, 21 fevral, AZƏRTAC
İtaliyada qışın yağıntısız keçməsi ölkənin yenidən quraqlıqla üzləşməsi ehtimalını artırır.
AZƏRTAC “The Guardian” qəzetinə istinadla xəbər verir ki, ekoloqların sözlərinə görə, Alp dağlarında yağıntıların mövsüm normasının yarısından da az olması ölkədə quraqlıq təhlükəsi yaradır.
Alp dağlarında qarın həcminin 53 faiz azalması çayların su ehtiyatlarının səviyyəsinin enməsinə səbəb olub. Mənbəyi Alp dağlarından başlayan və Adriatik dənizinə tökülən Po çayında (İtaliyanın ən böyük çayı) suyun səviyyəsi analoji dövrün orta göstəricisinə nisbətən 61 faiz azalıb. Yağıntının olmaması və yüksək atmosfer təzyiqi nəticəsində Venesiyanın bəzi kanallarında su normal səviyyədən yarım metrədək aşağı düşüb. Kanallarda qayıqların və su taksilərinin hərəkəti çətinləşib.
Meteoroloqların son proqnozuna görə, yaxın günlərdə Alp dağlarında güclü qar və yağışlar gözlənilir.
Ötən ilin yayında İtaliya son 70 ilin ən şiddətli quraqlığına məruz qalmışdı. Hakimiyyət orqanları Po çayına bitişik rayonlarda (İtaliyanın kənd təsərrüfatı istehsalının təxminən 35 faizi bu bölgədə yerləşir) fövqəladə vəziyyət rejimi elan etmişdi.
Bölmənin digər xəbərləri
